Мадуро билан бирга рафиқаси ҳам қўлга олинган. Силия Флорес ўзи ким ва нимада айбланмоқда?

Силия Флорес 1956 йилда, Венесуэла пойтахти Каракасдан 200 км ғарброқда жойлашган Тинакилио шаҳрида туғилган. У тўрт ёшдалигида оила Каракасга кўчиб келган. Улар шаҳар ғарбида аҳоли зич жойлашган Катия ва Бокероне туманларида яшашган.

Силия 32 ёшида хусусий Санта-Мария университетини тамомлаб, жиноий ва меҳнат ҳуқуқлари соҳасига ихтисослашган ҳуқуқшуносга айланади. Унинг ҳаёти 1992 йилда тубдан ўзгариб кетади. Ўшанда Венесуэла армияси подполковниги ва Боливар инқилобий ҳаракати (MBR-200) армия бўлинмаси раҳбари Уго Чавес президент Карлос Андрес Пересга қарши муваффақиятсиз давлат тўнтариши уюштиради. Флорес эса 1992–1994 йилларда уни судда ҳимоя қилган жамоа таркибида ишлайди.

Флорес Чавесни озод этиш талаб қилиб ўтказилган митингида MBR-200 фаоли Николас Мадуро билан танишиб қолган. Ўшанда у оилали, уч нафар фарзанди бор эди. Кўп ўтмай у ажрашади, собиқ турмуш ўртоғи Валтер Рамон Гавидиа билан дўстона муносабатларни сақлаб қолади ва Мадуро билан учрашишни бошлайди.

Чавес ва унинг сафдошлари 1994 йилда амнистия билан озод этилади ва оммавий сиёсий ҳаракат тузишади. Флорес ҳам, Мадуро бу ҳаракатда етакчи ўринларда бўлишади. 1998 йилда Чавес президентликка сайланганидан кейин турли муҳим лавозимларда ишлашади, 2000 йилги сайловлардан кейин парламент депутатларига айланишади. 2005 йилда Мадуро спикер бўлади. Бир йил ўтиб Чавес уни ташқи ишлар вазири этиб тайинлайди, спикер лавозимини эса Флорес эгаллайди ва мамлакат тарихида парламент раҳбарлигига келган биринчи аёл бўлади.

Чавеснинг жанговар сафдошининг бу лавозимдаги фаолияти можароларсиз кечмаган. Масалан, у парламент йиғилишлари залига ОАВ вакиллари киришини тақиқлаган ва бу тақиқ 2016 йил январигача ўз кучида қолади, фақат навбатдаги парламент сайловларидан кейин Миллий ассамблея устидан назоратни қўлга киритган мухолифат томонидан бекор қилинади.

Флорес непотизмда ҳам айбланган: маҳаллий касаба-уюшмаларига кўра, у парламент аппаратига ўзига яқин бўлган 40 га яқин кишини ишга олган, улар орасида тўрт нафар ака-укалари, икки амакиваччаси ва яна икки қариндоши, шунингдек, собиқ турмуш ўртоғи бўлган. 2009 йилда Флорес Венесуэла Бирлашган социалистик партияси раҳбари ўринбосари лавозимини эгаллайди (партия раҳбари Чавес эди). 2012 йилда Мадуро мамлакат вице-президентига айланади, Флорес – бош прокурор бўлади.

2013 йилда Чавес вафот этади. У амалда ўлимидан олдин Мадурони ўз вориси этиб танлаганди, аммо ҳокимиятга бошқа даъвогарлар ҳам йўқ эмасди. Флореснинг Венесуэла сиёсий элитасидаги таъсири ўша пайтда Мадуронинг таъсиридан кам эмасди. Унинг қўллови Мадурога нафақат президент бўлишга, балки ҳокимиятни чинакамига ўз қўлига олишга ёрдам берди, деб қайд этади CNN.

Ўша йили Мадуро ва Флорес турмуш қуради (улар бунга қадар ҳам бирга яшаб келишган ва олдинги турмушларидан бўлган фарзандларини биргаликда тарбиялашган).

У биринчи хоним унвонини «ҳаддан ташқари буржуага хос» деб воз кечади – уни «биринчи курашчи» деб атай бошлашади. Шу билан бирга, анъанага кўра Флорес давлат раҳбарлари рафиқаларига хос бўлган ролни бажаради: асосан оналик ва болаликни ҳимоя қилишга қаратилган хайрия ишлари билан шуғулланади. Хусусан, давлат телевидениесида ва радиода муаллифлик кўрсатувларини олиб боради. Шу билан бирга, у турмуш ўртоғининг энг муҳим маслаҳатчиси ва Венесуэладаги энг нуфузли сиёсий арбоблардан бири бўлиб қолади.

Бироқ сўнгги йилларда ОАВнинг эътибори унинг ўзига эмас, балки оиласига қаратилганди.

2015 йилда Ҳаитида полиция Силия Флореснинг қариндошлари – Эфраин Антонио Кампо Флорес ва Франсиско Флорес де Фрейтасни қўлга олади – улар АҚШ ҳудудига 800 килограмм миқдордаги кокаинни олиб ўтишга уринишда айбланган. Улар Ҳаитига Венесуэла дипломатик паспортлари билан киришган, ҳолбуки уларда расман дипломатик мақом ва иммунитет йўқ эди. Улар АҚШга топширилади – Флорес ўшанда буни «одам ўғрилаш» деб баҳолаганди. 2017 йил декабрида Америка суди уларнинг иккисини ҳам гиёҳванд моддалар савдосида айбдор деб топиб, 18 йилга қамайди.

Тергов версиясига кўра, улар ўзаро тил бириктириб, Каракасдаги Майкетия аэропортидаги президент ангаридан фойдаланиб, у ердан 800 кг кокаинни Гондурасга олиб бориб, у ердан Қўшма Штатларга олиб ўтишни режалаштирганди.

Уларнинг иккиси ҳам 2022 йил октябр ойида, ўша пайтдаги президент Жо Байден томонидан Венесуэлада қамоқда бўлган етти нафар америкаликни озод қилиш бўйича келишув доирасида афв этилган ва озод қилинган.

Флореснинг бошқа бир қариндоши, Карлос Эрик Малпика Флорес ва бу оиланинг яна бир қанча аъзолари (бу оила Силиянинг синглиси Элоиза орқали қариндошлар ҳисобланган) 2018 йилда Панама санкцияларига учраган. Улар жиноий даромадларни легаллаштириш ва терроризмни молиялаштиришда айбланган 16 та компаниядан иборат тармоқни назорат қилишган.

Силия Флорес 2018 йилдан АҚШ санкциялари остида бўлган. 2025 йил декабрида, Трамп маъмурияти Карлос Эрик Малпики Флорес, унинг ота-онаси, рафиқаси, сингиллари ва қизларига ҳам санкциялар қўллаганди. Аммо ҳозирда энг жиддий муаммолар Силия Флореснинг ўзида юзага келди.