Ўзбекистон футзал миллий жамоаси Осиё Кубогида Австралияни мағлуб этди

С гуруҳининг 2-тур ўйинида ўзбекистонликлар иродали ғалабага эришди ва гуруҳдан чиқиш имкониятини сақлаб қолди.

Индонезияда футзал бўйича Осиё Кубоги давом этмоқда.

Ўзбекистон миллий жамоаси C гуруҳи 2-турида Австралия билан ўйнади ва 0:2 ҳисобида ютқазаётган бўлишига қарамай, якунда 4:2 ҳисобида ғалаба қозонди. Гуруҳнинг яна бир ўйинида Япония футзалчилари Тожикистонни 3:0 ҳисобида мағлуб этди.

Бу натижалардан сўнг, Япония 6 очко жамғариб, гуруҳдан чиқиш масаласини ҳал қилди. Ўзбекистон ҳисобида 4, Тожикистонда 1 очко бор. Австралия – очкосиз.

Якуний тур 1 феврал куни бўлиб ўтади ва Ўзбекистон – Япония, Тожикистон – Австралия ўйинлари ўтказилади. Ўзбекистонни дуранг натижа ҳам қониқтиради.

Осиё Кубогида 16 та миллий жамоа 4 та гуруҳга ажратилган ҳолда иштирок этмоқда. Гуруҳларда 1- ва 2-ўринни эгаллаган жамоалар плей-офф босқичига чиқади. Ушбу Осиё Кубогида футзал бўйича жаҳон чемпионати йўлланмалари ўйналмайди.

Футзал бўйича Осиё Кубоги 1999 йилдан буён ўтказилмоқда. Унда фақат икки миллий жамоа ғолиб бўлган – Эрон (13 марта) ва Япония (4 марта). Ўзбекистон футзалчилари 4 марта кумуш ва 6 марта бронза медалларини қўлга киритган.

Футзал бўйича Осиё Кубоги
30 январ, Жакарта (Индонезия)
С гуруҳи, 2-тур

ЎЗБЕКИСТОН – АВСТРАЛИЯ 4:2
Голлар: Анасхон Раҳматов 9, Ихтиёр Ропиев 11, Илҳом Ҳамроев 19, Музаффар Аҳаджонов 37 – Жиден Ҳарб 7, 8

Ўзбекистон (дастлабки бешлик): Аббос Элмуродов, Ихтиёр Ропиев, Илҳом Ҳамроев, Элбек Тўлқинов, Шаҳрам Фахриддинов.

Захира: Шавкат Ибрагимов, Анасхон Раҳматов, Аброр Аҳмедзянов, Сунатулла Жўраев, Акбар Усмонов, Хайрулло Солиҳов, Музаффар Аҳаджонов, Элдор Нигматов, Самариддин Беркинов.

Австралия (дастлабки бешлик): Ноа Феилич, Доминик Кокс, Ваде Жиовенали, Грант Линч, Итан Де Мело.

Захира: Аарон Ю, Тилер Гарнер, Сезар Касадо Рубио, Жордан Геррейро, Скотт Роган, Адам Стюарт Купер, Жиден Ҳарб, Майкл Кута, Жейми Диб

Футзал, Осиё Кубоги, Ўзбекистон футзал миллий жамоаси