Yamaha хавфсизлик ёстиқчасига эга дунёдаги илк скутерни тақдим этди

Ёстиқча фақат олд томондан тўқнашув содир бўлганида ва муайян секинлашиш ҳолатида ишга тушади. Орқадан ёки ён томондан зарба бўлганда ёки ағдарилиш ҳолатида у очилмайди.

Фото: yamaha-motor.eu

Yamaha компанияси янгиланган уч ғилдиракли Tricity 300 скутерини намойиш қилди. У сегмент тарихида илк бор хавфсизлик ёстиқчаси билан жиҳозланган.

Тизим олд панелга ўрнатилган ва корпуснинг марказий қисмида жойлашган иккита G-сенсор орқали бошқарилади. Датчиклар скутернинг олд қисмида зарбага хос кескин секинлашни аниқлаб, ёстиқчани ишга туширади.

Мотоцикллардаги ўхшаш тизимлардан фарқли равишда, унда сферик шаклдаги ёстиқча қўлланилган. У юқорига очилиб, ҳайдовчи билан рул колонкаси ўртасида тўсиқ ҳосил қилади ва кинетик энергияни самарали ютади.

Ёстиқча фақат олд томондан тўқнашув содир бўлганида ва муайян секинлашиш ҳолатида ишга тушади. Орқадан ёки ён томондан зарба бўлганда ёки ағдарилиш ҳолатида у очилмайди. Тизим тўлиқ синов циклларидан, жумладан компютер моделлаштириш ва ҳақиқий краш-тестлардан ўтган.

Буюк Британия бозорида янги модел 11 770 доллар деб баҳоланмоқда.