«Синдоров-Карлсен баҳсини жон деб кўрган бўлардим» — Гарри Каспаров

Шахмат бўйича 13-жаҳон чемпиони Гарри Каспаров ўзбекистонлик шахматчи Жавоҳир Синдоровнинг Номзодлар турниридаги муваффақиятли юришига изоҳ берди.

Фото: Instagram / javokhir_sindarov

«Ҳозирги вундеркиндлар 12-13 ёшда гроссмейстерга айланяпти. Уларнинг даражасини 15 ёшида гроссмейстер бўлган Бобби Фишер даражасига тенглаштирган бўлардим.

Лекин деярли тажрибага эга бўлмаган турнирнинг энг ёш қатнашчиси барча тажрибали рақибларини енгиши ажойиб. Мен Синдоров-Карлсен баҳсини жон деб томоша қилган бўлардим. Бу мен учун ҳақиқий матч бўлган бўлар эди», деди у.

Айни вақтда Жавоҳир қора доналар билан Фабиано Каруанага қарши ўйнамоқда.

Синдоров Номзодлар турнирида 8 очко билан якка пешқадам бўлиб турибди. Унинг энг яқин таъқибчиси Аниш Гири билан орадаги фарқ энди 2 очкони ташкил этмоқда ва қолган 4 турда бу фарқни йўққа чиқариш деярли имконсиз иш.

Бундан ташқари, ўзбекистонлик шахматчи Номзодлар турнирида энг кўп ғалабага эришган шахматчи сифатида рекорд ўрнатди, турнирда ҳозиргача ҳеч ким 6 марта ғалаба қозонмаганди.