Дунёдаги энг йирик авиаташувчи кема рекорд даражадаги миссиядан сўнг уйига қайтади

Дунёдаги энг йирик USS Gerald Ford самолёт ташувчи кемаси Эронга қарши урушда ва Венесуэла раҳбари Николас Мадурони қўлга олишда қатнашган 300 кундан ортиқ рекорд даражадаги сузишдан сўнг уйига қайтади.

Фото: Makis Kartsonakis/Reuters

The Guardian нашрининг ёзишича, америкалик икки расмий авиаташувчи кема яқин кунларда Яқин Шарқни тарк этишини ва май ойи ўрталарида Виржиниядаги ўз портига қайтишини маълум қилган.

Ўтган ҳафта минтақага USS George Bush авиаташувчиси етиб келди, натижада Яқин Шарқда Американинг учта шундай кемаси жойлаштирилди - бу 2003 йилдан бери кузатилмаган ҳолат. USS Abraham Lincoln кемаси ҳам январь ойидан бери минтақада.

Шу ойда USS Gerald Ford авиаташувчиси Норфолк ҳарбий-денгиз базасидан кетганидан кейин деярли 10 ойни денгизда ўтказиб, Ветнам урушидан кейинги энг узоқ муддатли сузиш бўйича Америка рекордини янгилади.

Аввалроқ бу рекорд 2020 йилда COVID-19 пандемияси пайтида 294 кун денгизда бўлган USS Abraham Lincoln кемасига тегишли эди. Шу билан бирга, бу ҳозир ҳисобдан чиқарилган «Мидуэй» авиаташувчисига тегишли бўлган сузиш рекордига етмайди. У 1972 ва 1973 йилларда 332 кун давомида денгизда бўлган.

USS Gerald Ford ўз саёҳатини Ўртаер денгизи йўналишидан бошлади. Кейин октябрь ойида Кариб денгизига йўналтирилди, бу минтақадаги сўнгги ўн йилликлардаги энг йирик денгиз кучларини ошириш доирасида амалга оширилди.

Авиаташувчи Мадурони қўлга олиш бўйича ҳарбий операцияда иштирок этди. Кейин Эрон билан муносабатлар кескинлашганда Яқин Шарққа йўл олиб, янги жангларда иштирок этди.

Авиаташувчи Эрон билан урушнинг дастлабки кунларида Ўртаер денгизида эди, кейин эса март ойи бошида Сувайш каналидан ўтиб, Қизил денгизга чиқди. Бироқ, кир ювиш хоналаридан биридаги ёнғин авиаташувчини таъмирлаш учун Ўртаер денгизига қайтишга мажбур қилди.