Алекс Фергюсон «Олд Траффорд»дан шифохонага олиб кетилди

Англия чемпионатининг 35-тури учрашуви олдидан стадионда бўлган Фергюсон ўзини ёмон ҳис қилганидан сўнг шифохонага олиб кетилган. Хабар қилинишича, гап эҳтиёт чораси ҳақида бормоқда.

Фото: REUTERS

«Манчестер Юнайтед»нинг собиқ мураббийи сэр Алекс Фергюсон жамоанинг «Ливерпул»га қарши баҳси олдидан ўзини ёмон ҳис қилди ва шифохонага олиб кетилди, деб хабар берди Daily Mail.

Нашр хабарига кўра, 84 ёшли Фергюсон ўйин бошланишидан бир соат олдин шифохонага ётқизилган. Унга эҳтиёт чораси сифатида тиббий кузатув тайинланган. Фергюсонга тез вақт ичида уйига жавоб берилиши кутилмоқда.

Алекс Фергюсон — «Манчестер Юнайтед» тарихидаги энг совриндор мураббий ҳисобланади. У клубни 1986 йилдан 2013 йилгача бошқарган. «Манчестер Юнайтед» Фергюсон бошқарувида 13 марта Англия чемпиони бўлган. Шотландиялик мураббий клубдаги 26 йиллик фаолияти давомида жами 38та совринни қўлга киритган.

Мураббийликдан кетганидан сўнг Фергюсон «Манчестер Юнайтед» элчиси ва клуб директорлар кенгаши аъзоси сифатида фаолият юритди. 2024 йил октябрда клубнинг янги эгаси Жим Рэтклифф ва INEOS компанияси унга элчилик фаолияти учун йилига 2,16 млн фунт стерлингга тенг маош тўлашни тўхтатди.