Шомуродов жаҳон чемпионатидаги деярли имконсиз гол муаллифи бўлди

Элдор Шомуродов учун зарбани муваффақиятли амалга ошириш шу қадар мураккаб бўлганидан xG модели унинг гол билан якунланиш эҳтимолини бир фоиздан сал кўпроқ деб баҳолади.

Фото: Anvar Ilyasov/ Getty Images

Ўзбекистон миллий жамоаси ҳужумчиси Элдор Шомуродов жаҳон чемпионатидаги энг эҳтимоли паст гол муаллифи бўлди. Бу ҳақда OptaJose статистика портали ўзининг X ижтимоий тармоғидаги саҳифасида маълум қилди.

Порталнинг ёзишича, унинг голи учун xG кўрсаткичи атиги 0,013 ни ташкил этган.

Конгога қарши гуруҳ босқичи сўнгги учрашувининг 10-дақиқасида Элдор Шомуродов Акмал Мозговойнинг узатмасидан сўнг ҳисобни очди.

Қайд этилишича, зарбани муваффақиятли амалга ошириш шу қадар мураккаб эдики, xG модели унинг гол билан якунланиш эҳтимолини бир фоиздан сал кўпроқ деб баҳолади.

Бу Элдор Шомуродовнинг жаҳон чемпионатидаги дебют голи бўлди. У ўйиннинг 30-сониясидаёқ Мпаси-Нзау қўриқлаётган дарвозани ишғол этганди, аммо гол офсайд туфайли бекор қилинди. Якунда Фабио Каннаваро шогирдлари 1:3 ҳисобида мағлуб бўлишди.

Маълумот учун xG (Expected Goals — кутилган голлар) — футболдаги замонавий статистик кўрсаткич бўлиб, дарвозага берилган зарбанинг гол билан якунланиш эҳтимолини баҳолайди. Модел ҳар бир зарбага 0 дан 1 гача бўлган қиймат беради: бунда 0 — гол уриш деярли мумкин эмаслигини, 1 эса муқаррар голни англатади. Баҳолаш минглаб ўхшаш ҳолатлар бўйича йиғилган маълумотлар асосида бўлади.

Баҳолаш эҳтимолига дарвозагача бўлган масофа, зарба бурчаги, ҳужум тури, зарба тананинг қайси қисми билан берилгани, ҳимоячилар қаршилиги ва дарвозабоннинг жойлашуви таъсир кўрсатади.

Шу тариқа xG яратилган вазиятлар сифатини баҳолаш имконини беради ва жамоа ёки футболчи ўртача самарадорлик шароитида қанча гол уриши керак бўлганини кўрсатади.