«Нима деса, деяверишсин». Месси ҳейтерларга жавоб қайтарди ва ғалабани Марадонага бағишлади

ЖЧ-2026 яримфиналида Аргентина ва Англия ўртасида кечган учрашув (2:1) кутилганидек кечди: ҳиссиётли, кескин, зиддиятларга бой ва драматик якун. Жамоалар биринчи бўлимда ҳақиқий қирғинбарот уюштиришди, иккинчи бўлимга келибгина футбол ўйнай бошлашди. Ва унда «Албиселеста»нинг қўли баланд келди: жанубий америкаликлар биринчи бўлиб гол ўтказиб юборганига қарамай, ўйин охирида қўшимча куч топа олишди ва британияликлар «ўрнатган автобус»ни бузиб ўтишди.

Ўйин ҳакам ҳуштаги чалинганидан кейин ҳам «ёнди»: Жанубий Америка вакиллари бу ғалабани Фолкленд урушини ёдга солувчи провокацион плакат билан нишонлашди, Англия миллий жамоаси яримҳимоячиси Жуд Беллингҳэм эса ҳиссиётларини жиловлай олмади ва рақиб футболчиси Валентин Барконинг бошига уриб қолди, ғалаба голи муаллифи Лаутаро Мартинес интервю вақтида йиғлаб юборди, ҳимоячи Кристиан Ромеро эса собиқ инглиз футболчиси Гари Невиллнинг танқидига жавоб қайтарди.

«Чинакам телбалик»

Икки голли узатмаси билан Аргентинанинг навбатдаги камбэкининг асосий ижодкори бўлган Лионел Месси ўйиндан кейин журналистлар билан гаплашди ва ўз манзилига билдирилаётган нафратли сўзларга жавоб қайтарди.

«Ким нима деса деяверсин. Биз курашамиз, рақобатлашамиз ва футбол ўйнашни биламиз. Бугун ҳисобда ортда қолаётган бўлсак ҳам, Англияга қарши ўйинни тўлиқ назорат қилдик. Биз бу мақомга ўз меҳнатимиз билан эришдик. Ҳеч ким бизга ҳеч нарсани шунчаки бериб қўймайди», – дея аргентиналиклар сардорининг сўзларини келтиради инсайдер Фабрицио Романо.

Месси ушбу ўйин аргентиналиклар учун принципиал аҳамиятга эга бўлганини тан олган.

«Мадҳия ижро этилаётган вақтдаёқ бизда ўзгача туйғулар бор эди. Бирортамиз мағлубиятга рози бўла олмасдик, Аргентина халқи ҳам бу ғалабани қаттиқ кутаётганди – барча Англияни мағлуб этиш орзусида эди.

Финалга чиқишми? Бундай ўйинларнинг ҳар бири алоҳида ўзгача. Бу ҳиссиётларни яна бир бор бошдан кечириш – ақл бовар қилмас ҳодиса. Ўйлайманки, бизнинг жамоа эришган нарса – чинакам телбалик: қаторасига икки жаҳон чемпионати финали.

Очиғини айтсам, жаҳон чемпионати бошланишидан олдин биз кучли тўртликка киришимиз, чемпионлик учун курашишимизга ишончим комил эди. Бу натижа мени ажаблантирмайди, чунки нималарга қодирлигимизни биламан. Муаммоларимиз бор эди, лекин жамоамиз йиғилиб, бирлашса, ҳар қандай қийин вазиятдан чиқиб кета олади. Биз бир-биримизни қўллаб-қувватлаймиз», – дея форварднинг сўзларини келтиради TyC Sports.

У Англия устидан қозонилган ғалабани аргентиналик бошқа бир афсонавий футболчи – Диего Марадонага бағишлаган.

«Ишончим комилки, у ҳозир юқорида бу лаҳзадан завқланяпти. Бу унинг ҳам ғалабаси. Унга қувонч ҳадя эта олганимиздан бахтиёрман ва умид қиламанки, у ўша ерда буни ўзи хоҳлагандек нишонлайди ва бундан завқ олади», – дея Мессидан иқтибос келтиради Романо.

Энди Аргентинани мундиалнинг ҳал қилувчи ўйини кутмоқда. Лео финалдаги бўлажак рақиб – Испания миллий жамоаси ҳақида ҳам фикр билдирган.

«Бу ажойиб футболчилар ва ўз ўйин услубига эга ажойиб жамоа. Испанларнинг кўпчилигини яхши биламан, уларни диққат билан кузатиб бораман. Бизни жуда кескин ва ўзига хос ўйин кутмоқда», – дея қайд этган футболчи.

Беллингҳэм – Месси билан баҳси ҳақида

Ўйин вақтида Лео ва Жуд Беллингҳэм ўзаро баҳслашиб кетди – уларнинг тортишуви трансляцияга тушиб қолган. Аммо ўйиндан кейин «Уч шерлар» футболчиси ҳароратни пасайтирди.

«Месси билан ҳеч қандай муаммо йўқ. Биз у билан рикошетни муҳокама қилдик, аслида у ерда ҳеч қандай ёмон иш бўлгани йўқ. Кимдир пашшадан фил ясамаслиги керак, у ерда ҳеч нима бўлмади. Мен учун Леога қарши ўйнаш жозибали», – дея Беллинҳэмнинг сўзларини келтирган Романо.

Шу билан бирга Жуд ўзи иштирокидаги бошқа бир эпизод юзасидан изоҳ бермаган – у ўйиндан кейин рақиблар ўз олдида ғалабани нишонлаётганида улардан бири Валентин Барконинг бошига урганди. Ҳозирча футболчидан расмий изоҳ йўқ, ОАВ эса бу борада ўз версиясини тақдим этмоқда.

Кадрдан кўриш мумкинки, катта эҳтимол билан, инглиз футболчиси жанубий америкаликлардан ўзига ёқмайдиган сўз эшитган ва шундан кейин ўзини тия олмаган: у Баркога ортдан яқинлашади ва унинг бошига ортдан шапалоқ туширади. Бунгача Валентиннинг йўли Беллингҳэм билан туташмаган – у бутун ўйин давомида захира ўриндиғида қолганди.

Англия миллий жамоаси собиқ дарвозабони Пол Робинсон эса BBC эфирида Барко Энцо Фернандеснинг голини инглизлар захира ўриндиғи қаршисига келиб нишонлаган ҳолда провокация қилганини айтиб ўтди.

«Умид қиламанки, мен бундай аҳмоқ бўлиб қолмайман»

Ўйинда бошқа баҳсли вазиятлар ҳам бўлди. Аргентиналиклар ғалабани нишонлаш чоғида Малвин ороллари (Аргентина ва Англия ўртасидаги ҳудудий баҳс предмети бўлган Фолкленд оролларининг маҳаллий номланиши) ҳақидаги баннер билан эътиборни ўзига қаратишди. Ўйиндан кейин жанубий америкаликлар инглизларга «зарба бериш»да давом этишди. Масалан, Леандро Паредес журналистлар билан мулоқот чоғида шундай деган: «Ороллар доим Аргентинаники бўлади».

Ҳимоячи Кристиан Ромеро эса Англия миллий жамоаси собиқ футболчиси, телеэксперт Гари Невиллга жавоб қайтарди: ўйиндан олдин у аргентиналиклар мудофаа чизиғини танқид қилганди.

«Умид қиламанки, карьерамни якунлаганимда, фақат ўйинчиларнинг ҳаракатларидан камчилик қидирадиган аҳмоқ одамга айланиб қолмайман. Биз тарих яратмоқдамиз ва миллий жамоа аъзоси эканимиздан фахрланамиз», – деган «Тоттенҳэм» ҳимоячиси.

«Бу жамоа қийинчиликка учраганда яхшироқ ўйнайди»

Ўйиндан кейинги энг ҳиссиётли паллалар ғалаба голи муаллифи Лаутаро Мартинеснинг интервюси бўлди. У кўз ёшларини тийиб тура олмади.

«Отам менга биринчи бутсани олиб берганидан бери бу голни орзу қилардим. Бу онам учун аталган гол. У уйдан кетган кунимдан бери ҳар доим ётоғимни тайёрларди ва мени кутишда давом этарди. Бу гол мен учун финалга чиқишдан ҳам муҳимроқ», – деган форвард.

Аргентина миллий жамоаси бош мураббийи Лионел Скалони яна бир бор ўз шогирдларидаги характерни эътироф этди.

«Бизда ажойиб жамоа бор. Бугун захира ўриндиғидан майдонга тушганлар, муҳим рол ўйнашди. Футболда, ҳаётда бўлгани каби, охиригача борингни беришинг керак. Бу жамоа қийинчиликка дуч келганида, яхшироқ ўйнайди.

Агар Энцо Фернандес тўғри зарба бера олмаганида, биз еттита голли вазият яратиб ҳам 0:1 ҳисобида ютқазган бўлардик. Биз охиригача таслим бўлмадик. Биз ғалаба қозонганимиз учунгина эмас, турли вазиятлардан чиқиб кета олганимиз учун муваффақиятлимиз. Ўйлайманки, ҳақли равишда ғалаба қозондик. Биз кейинги синовга тайёрмиз», – деган Скалони Аргентина футбол ассоциацияси сайтига.

«Аргентина бежиз амалдаги чемпион эмаслигини исботлади»

Англия лагеридагилар, табиийки, бутунлай бошқача кайфиятда. Жамоа ҳужумчиси ва сардори Ҳарри Кейн ғалаба қўлдан бой берилганидан қаттиқ ранжиган.

«Йигитлар учун, бутун жамоа учун жуда оғир ва аламли. Учрашувнинг катта қисмида биз яхшироқ ҳаракат қилдик. Устунликни сақлаб қолишга уриндик, аммо жаҳон чемпионати яримфиналида бу етарли эмас. Ҳужум кетидан ҳужум қилишди ва биз ўйиндаги назоратни қайтариб ололмадик. Озгина етишмай қолганида, бу жуда оғриқли бўлади», – деган инглизлар жамоаси сардори BBC учун интервюсида.

Жамоа ҳимоячиси Дэн Бёрн ҳам шунга ўхшаш фикр билдирган.

«Жаҳон чемпионати финалига атиги 10-15 дақиқа қолганда, кейин етиб бора олмай қолсанг, бу жуда оғриқли. Ҳамжиҳатлигимиз бизни узоққа олиб келди ва тўғрисини айтсам, биз буни уддалаймиз деб ўйлагандим. Вақтимиз келгандек туюлганди. Аммо Аргентина бежиз амалдаги жаҳон чемпиони эмаслигини кўрсатиб қўйди», – деган Бёрн Sky Sports телеканалига.

Англия миллий жамоаси бош мураббийи Томас Тухелнинг интервюси эса энг шов-шувлиси бўлди. Ушбу германиялик мутахассисга ўйиндан сўнг мухлислар ва экспертларда кўплаб саволлар тўпланганди, у эса ўз хатоларини тан олишдан бош тортди ва мағлубият билан якунланган яримфинал ўйинини Англиянинг ушбу жаҳон чемпионатидаги энг яхши ўйинларидан бири деб атади.

«Бизда афсусланиш йўқ. Муаммо таркибда эмасди. Ўйиннинг бориши бутунлай ўзгарди, лекин нима учун буни муҳокама қилишаётганини тушунаман. Мендан яхшироқ биламан деб ўйлайдиган миллионлаб мураббийлар бор. Мен улар билан ҳамма нарсани муҳокама қилишим мумкин эди, лекин қарорни ўзим қабул қилишим керак», – дея қайд этган мутахассис.