Toyota 2027 йилги Crown моделини намойиш этди

Toyota 2027 йилги янгиланган Crown кроссоверининг илк тасвирларини намойиш қилди. Автомобил премьераси сентябрь ойининг ўрталарида бўлиб ўтади.

Моделнинг ташқи кўринишидаги ўзгаришлар унчалик катта эмас. Ишлаб чиқарувчи кузовнинг аввалги қора рангини янги Neutral Black тусига алмаштиради. RS версиясида қизил тормоз суппортлари бошланғич комплектацияда бўлади. Бундан ташқари, автомобил горизонтал нур қайтаргичларга эга бироз ўзгартирилган бампер билан жиҳозланди.

Салонда жиддий ўзгаришлар кутилмаяпти, бироқ Toyota жиҳозлар рўйхатини қайта кўриб чиқди. Қишки пакет ва рул ости узатмаларни ўзгартириш ричаглари барча версияларнинг стандарт жиҳозларига киритилади. Опциялар рўйхатидан рақамли орқа кўриниш ойнаси ва ихчам захира ғилдираги олиб ташланади. Z ва RS комплектациялари стандарт тарзда рақамли калит билан таъминланади.

Япониянинг Creative Trend нашри маълумотларига кўра, янгиланган Toyota Crown бешинчи авлод гибрид тизими билан жиҳозланади. Бу тизим 2,5 литр ҳажмли атмосфера двигателини янада кучлироқ электромотор билан бирлаштиради. Қурилманинг умумий қуввати 236 от кучига етади, бу ҳозирги версиядан 5 от кучига кўпроқдир.

Шу билан бирга, 2,4 литрли турбомотор ва иккита электр двигателга эга унумдорлиги юқорироқ Dual Boost гибрид тизими ўзгаришсиз қолади. Унинг қуввати аввалгидек 344 от кучини ташкил этади.

Янгиланган Toyota Crown ҳақидаги тўлиқ маълумотлар сентябрь ойи ўрталарида ошкор қилинади — компания унинг техник хусусиятлари ва нархларини эълон қилади. Ҳозир моделнинг Япония бозоридаги нархи 40 минг доллар атрофида.