Xitoyda davlat kompaniyalarini isloh etish va qayta qurishga qiymati 350 mlrd yuan (52,5 mlrd dollar) bo‘lgan fond tashkil etildi. Bu haqda China Daily gazetasi xabar bermoqda.
Bu fondni tashkil etish tashabbusi aktivlar bilan shug‘ullanuvchi China Chengtong Holdings Group davlat korporatsiyasidan chiqdi. Qiymati 131 mlrd yuan (19,7 mlrd dollar) bo‘lgan birinchi kapitalga China Mobile, Sinopec va China Railway Rolling Stock Corporation singari 10 ta kompaniya hissa qo‘shdi.
Xitoyda iqtisodiyotning tushib borishi oqibatida mamlakatdagi sanoat ma'lum bir tomondan zarar ko‘rmoqda. XXRda so‘nggi yillarda sanoat ishlab chiqarish hajmi biroz pasaygan. 2011 yilda ishlab chiqarish ko‘rsatkichi 13,9 foizni, o‘tgan yildagi ko‘rsatkich esa 6,1 foizni tashkil etmoqda.
