Savchenko Oliy Rada mudofaa qo‘mitasi majlisini janjal bilan tark etdi

Ukraina Oliy Radasi deputati Nadejda Savchenko hamkasblari bilan tortishib qolgani sabab, parlamentning milliy xavfsizlik va mudofaa qo‘mitasining majlisini tark etgan.

Xabarlarga ko‘ra, qo‘mita a'zolari 2017 yilgi harbiy byudjyetni muhokama qilayotgan vaqtda, Savchenko o‘rnidan turib sumkasini olgan va eshikka yo‘nalgan. Yig‘ilish moderatori undan qayoqqa ketayotganini so‘ragan. Bunga javoban xalq deputati yaxshisi odamlar bilan suhbatlashaman, ana shu foydaliroq, deya eshikni qattiq yopib chiqib ketgan. Shundan so‘ng, qo‘mita a'zolari Savchenko ketishi bilan kvorum bo‘lmagani bois, qator muhim masalalarni muhokama qila olmasliklarini bildirishgan.

Xususan, parlament qo‘mitasi mudofaa byudjyetidan tashqari, Ukraina milliy xavfsizlik xizmati hisobotini ham tinglashi kerak edi. Bundan tashqari, Rossiyaga qarshi sanksiyalarni kengaytirish masalasini muhokama qilish belgilangandi. «Korrespondent.net» sayti xabar qilishicha, shundan so‘ng, qo‘mita rahbari Sergey Pashinskiy Savchenkoning Donetsk va Lugansk vakillari bilan aloqasini tekshirishni so‘rab, UXXga murojaat tayyorlash fikrini ilgari surgan. Shuningdek, tekshiruv mobaynida Savchenkoning davlat siriga oid faoliyatini to‘xtatib turish taklif qilingan.