AQSh Mo‘sulga hujum boshlanganidan buyon o‘ldirilgan IShID jangarilari sonini hisoblab chiqdi

17 oktabr kuni boshlangan Iroqning Mo‘sul shahrini ozod qilish harbiy operatsiyasi davomida IShID terrorchilik tashkilotining 800 nafardan 900 nafargacha bo‘lgan jangarisi halok bo‘lgan. Bu haqda AQSh Qurolli kuchlarining Yaqin Sharqdagi qo‘mondonligi rahbari Jozef Votel ma'lum qilgan.

Middle East Online nashrining generalga asoslanib xabar qilishicha, Iroq armiyasi va harbiylashgan kuchlarning hujumga o‘tishi natijasida IShID tashkiloti qo‘shimcha kuchlar va hatto qurollar oladigan yo‘l to‘sib qo‘yilgan.

"Bu paytga kelib, jangarilar uncha katta bo‘lmagan guruhlarga bo‘linib ketishgan", dedi Votel.

Bundan tashqari, harbiy boshliqning ma'lum qilishicha, ular mahalliy aholi vakillariga qo‘shilib ketishmoqdaki, bu ularni aniqlash va yo‘q qilish vazifasini og‘irlashtirmoqda.