Trampning e’tirozi: Britaniya Eronga zarbalar uchun bazalarini bermadi

AQSh prezidenti Donald Tramp Britaniya bosh vaziri Kir Starmerning Eronga nisbatan dastlabki zarbalarda AQShga Britaniya infratuzilmasidan foydalanishga yo‘l qo‘ymagani uchun tanqid qildi va buni “juda ko‘ngil qoldirgan” qaror sifatida baholadi. Britaniya matbuotida Starmer qarorni qabul qilishda xalqaro huquq masalasi bo‘yicha xavotirlari ham bo‘lgani yozildi.

Starmer esa Trampning tanqidiga javoban, urushga aralashmaslik bo‘yicha birinchi qaror Britaniyaning milliy manfaatlarini hisobga olgan holda qabul qilinganini, shunga qaramay AQShga faqat “aniq va cheklangan mudofaa maqsadlari” uchun bazalardan foydalanishga ruxsat berilganini bildirdi. Britaniya hukumati bayonotida bu qaror “kollektiv o‘zini himoya qilish” va mintaqadagi Britaniya fuqarolari xavfsizligini ta’minlash bilan asoslangani aytilgan.

Reuters va Britaniya manbalariga ko‘ra, Starmer Britaniya AQSh–Isroilning Eronga bergan asosiy zarbalarda ishtirok etmaganini ta’kidlagan, biroq AQShning Eron raketalari omborlari va uchirish uskunalariga qarshi “mudofaaviy” zarbalar uchun Britaniya bazalaridan foydalanish iltimosini qabul qilgan.

2 martga o‘tar kechasi Kiprdagi Britaniyaning RAF Akrotiri aviabazasiga dron zarbasi berilgani xabar qilindi. Kipr prezidenti Nikos Xristodulidis hujum “Shahed turidagi” dron bilan amalga oshirilganini, jabrlanganlar yo‘qligi, zarar esa katta bo‘lmaganini aytgan. Manbalar hujum qaysi nuqtadan uchirilgani bo‘yicha aniq xulosa yo‘qligini, ayrim alomatlar uni Eronga yaqin guruhlar tomonidan amalga oshirilgan bo‘lishi mumkinligini ko‘rsatishini qayd etgan.

Starmer Britaniyaning Kiprdagi bazalari “Amerika bombardimonchilari” tomonidan hozircha foydalanilmayotganini, ammo AQShga cheklangan mudofaaviy vazifalar doirasida ayrim ruxsatlar berilganini parlamentda ham aytgan.