Dunyodagi eng qisqa aviamarshrutdan foydalangan millioninchi yo‘lovchiga maxsus sovg‘a topshirildi

Shotlandiyaning Loganair aviakompaniyasi 1967 yildan buyon qatnaydigan, Ginnes rekordlari kitobiga kiritilgan  dunyodagi eng qisqa 2700 metrlik muntazam marshrut bo‘ylab o‘zining millioninchi yo‘lovchisini tashib o‘tdi. Shotlandiya Qirollik banki xodimi Enn Rendalga familiyadoshi - sakkiz o‘rinli samolyot komandiri Aleks Rendal tomonidan guldasta va sertifikat topshirildi. Millioninchi yo‘lovchi  Uestrey orolidan Uestrey Ota oroligacha parvozni amalga oshirgan. Bu haqida Daily Express nashri ma'lum qildi. 

Parvoz atigi 47 soniya davom etgan. Enn Rendal orollar o‘rtasida parvoz qilib, Loganair xizmatlaridan 10 ming marta foydalangan. U moliyaviy masalalarni muhokama qilish uchun 70 oroldan iborat arxipelagning turli jamiyatlariga tashrif buyurgan. 

Britten-Norman Islander samolyotlaridan foydalanuvchi aviakompaniya boshqaruvchi direktori Jonatan Hinklning so‘zlariga ko‘ra, "bizning noyob yo‘nalishimiz orollar aholisi uchun hayotiy muhim ahamiyatga ega". "U o‘quvchilar,  o‘qituvchilar, politsiya xodimlari va boshqa kasb egalarining kundalik ishlarida juda muhimdir", - deydi Hinkl.