"Tolibon" jangarilari Germaniyaning Afg‘onistondagi konsulligiga hujum qilishdi

"Tolibon" radikal harakati jangarilari Afg‘onistonning Mozori-Sharif shahrida joylashgan Germaniyaning konsulligiga hujum qilishdi. Bu haqda Reuters axborot agentligi xabar bermoqda. 

Ma'lum qilinishicha, jangarilar bomba bilan jihozlangan avtomobilni konsullik binosiga yo‘naltirishgan. Portlash oqibatida ikki kishi halok bo‘lgan, 60 dan ko‘proq kishi jarohat olgan. Biroq konsullik xodimlari orasida halok bo‘lganlar borligi ma'lum qilinmagan.  

"Tolibon" jangarilari ushbu hujum uchun javobgarlikni o‘z zimmalariga olganlar va bu NATO kuchlarining bir hafta avval Qunduzda amalga oshirgan aviazarbalari uchun javob hujumi ekanligini aytishgan. Ta'kidlanishicha, Germaniya NATO kuchlarining Afg‘oniston shimolida joylashishi uchun javobgardir.  

Ma'lum qilinishicha, Germaniya tashqi ishlar vazirligida ushbu voqea tufayli favqulodda yig‘ilish o‘tkazilmoqda.