Trampning sobiq xotini AQShning Chexiyadagi elchisi bo‘lish istagini bildirdi

AQShning yangi saylangan prezidenti Donald Trampning sobiq xotini Ivana Tramp AQShning Chexiyadagi elchisi bo‘lish istagini bildirdi. Bu haqida u The New York Post gazetasiga bergan intervyusida ma'lum qildi. 

"Unga meni AQShning Chexiya respublikasidagi elchisi etib tayinlashni taklif qilaman, - dedi u. - Men asli o‘sha yerlikman, chex tili - mening ona tilim va u yerda meni hamma yaxshi taniydi. Shuningdek men nafaqat Amerika, balki butun dunyo bo‘ylab tanilganman. Men uch kitob muallifiman, asarlarim 40 mamlakatda 25 tilga tarjima qilingan. "Ivana" nomi ostida tanilganman va "Tramp" familiyasining ismimga qo‘shib aytilishiga hojat yo‘q".

Ivana Tramp 67 yoshda, u Chexiyaning Zlina shahrida dunyoga kelgan. Trampning sobiq turmush o‘rtog‘i Karlovo universitetida ta'lim olgan, Chexiyaning chang‘i bo‘yicha terma jamoasi sharafini himoya qilgan. 1977 yilda u Trampga turmushga chiqqan, bu ayol uchun - ikkinchi, Donald uchun esa - birinchi turmush bo‘lgan. Juftlik 15 yil birga hayot kechirgan, ularning 3 nafar farzandi bor. Ivana Tramp besh tilda so‘zlashadi va muntazam ravishda o‘z Vatanini ziyorat qiladi. 

Chexiya prezidentining matbuot kotibi Milosha Zemana Yirji Ovchachek Ivana Trampning elchi bo‘lish haqidagi qarorini bajonidil qo‘llab-quvvatladi. Bu haqida u o‘zining Twitter'dagi mikroblogida ma'lum qildi. 

Bir qator chex siyosatchilari Ivananing qarorini qo‘llab-quvvatlashdi. "U bizning nimani his qilishimiz, nimaga intilishimiz hamda tariximizni yaxshi biladi. Mening fikrimcha, bu juda yaxshi bo‘lardi", - dedi Chexiya bosh vaziri o‘rinbosari, ANO harakati yetakchisi Andrey Babish Nova telekanaliga bergan intervyusida. 

"Bizning mamlakatimizga aloqasi bor, muammolarimizni yaxshi anglab yetuvchi inson elchi bo‘lsa, foydadan xoli bo‘lmaydi", - deya Babashning fikrini qo‘llab-quvvatladi Chexiyaning muxolifat Fuqarolik demokratik partiyasi yetakchisi Petr Fiala.