Hindiston mahalliy ballistik raketa sinovini muvaffaqiyatli o‘tkazdi

Hindiston harbiylari mahalliy harbiy mutaxassislar tomonidan ishlab chiqilgan Prithvi-II ballistik raketa sinovini muvaffaqiyatli o‘tkazdi, deb xabar qilmoqda PTI agentligi. 

Raketaning birinchi parvozi mahalliy vaqt bilan 09:35da Orissa shtatidagi Chandipur poligonida amalga oshirilgan. Oradan bir necha daqiqa o‘tgach, ikkinchi raketa uchirilgan. 

Ta'kidlanishicha, joriy yilda Prithvi loyihasidagi raketalar uchinchi marotaba havoga ko‘tarilmoqda. Fevral va may oylarida ham sinov parvozlari amalga oshirilgan edi. 

Prithvi-II raketasi "yer-yer" tasnifidagi qurilma bo‘lib, 500 kgdan 1 tonnagacha bo‘lgan yadro kallagini tashiy oladi. Uning parvoz masofasi 350 kmni, vazni 4,6 tonnani tashkil etadi.