AQShda IShIDni qo‘llab-quvvatlash aybi bilan markaziy osiyoliklar hibsga olindi

Qozog‘iston fuqarosi Axror Saidaxmetov IShID terrorchilik guruhiga ko‘mak ko‘rsatish maqsadida til biriktirishda o‘zini aybdor deb tan oldi. Bu haqda AQSh adliya vazirligi matbuot bayonotida ma'lum qilindi.

21 yoshli Saidaxmetov Nyu-Yorkda yashagan. U tergov bilan hamkorlik qilishiga qaramasdan, 15 yilga qamalishi mumkin.

AQSh prokurori Robert Keypersning aytishicha, ayblanuvchi Suriyaga borib, u yerda IShID safida jang qilmoqchi yoki AQShda terakt uyushtirmoqchi bo‘lgan. 

Ayblov xulosasiga ko‘ra, Saidaxmetov va uning o‘zbekistonlik sherigi Abdurasul Jo‘raboyev birgalikda Suriyaga borishmoqchi bo‘lishgan, agar bu reja amalga oshmasa, unda avtomat sotib olib, politsiyachilarni otib tashlashmoqchi bo‘lganlar. Ayblanuvchi 2015 yilda Nyu-Yorkdagi Kennedi nomidagi aeroportda ushlangan. U bu yerdan Turkiyaga uchib ketmoqchi bo‘lgan. Uning sherigi Jo‘raboyev ham o‘sha kuni qo‘lga olingan. Uning yonida ham Turkiyaga chipta bo‘lgan. Ushbu ish bo‘yicha O‘zbekistonning yana bir fuqarosi Abror Xabibov ham o‘tmoqda, u terrorchilarga pul yig‘ishga urinishda ayblanmoqda.