Rustam Sa'diyev: “Paxtachilik sohasini bitirgan ham film olaversa, professional kino haqida gapirishga ertalik qiladi...”

Avval xabar berganimizdek, Kun.uz sayti o‘zbek kinosida o‘ziga xos yo‘nalish paydo qila olgan, uni jahon kinosi darajasiga olib chiqish uchun ilk qadamini tashlagan, iste'dodli o‘zbek rejissyori Rustam Sa'diyev bilan videosuhbat o‘tkazgan edi. Ushbu uchrashuv davomida turli mavzularda suhbatlashildi. 

Rejissyor O‘zbekistonda faoliyat yuritayotgan hamkasblari haqida so‘zlar ekan, uning aytishicha, o‘zbek rejissyorlari orasida eng yaxshilari 20 nafarni tashkil etishini ta'kidlab o‘tdi.

“Har bir ishni o‘z mutaxassisi bajarishi lozim. Sohaga taalluqli bo‘lmagan odam o‘sha ishga qo‘l ursa, rivojlanish o‘rnida, orqaga ketish kuzatiladi. Bu tabiiy holat. Kino sohasida ham huddi shunday. San'atning bu yo‘nalishida faoliyat yuritayotgan professionallar ham yo‘q emas. Hamkasblarimdan Zulfiqor Musoqov, Ayyub Shahobiddinov, Yolqin To‘ychiyev, Mirmahsud Oxunov, yoshlardan Jahongir Ahmedov, Akbar Bekturdiyev, Sarvar Karimovlarni ana shunday kino mutaxassislari safiga qo‘sha olaman. Bundan tashqari, o‘zbek kinosining tirik afsonasi bo‘lmish Shuhrat Abbosovni ham mazkur ro‘yxatga qo‘shmasdan bo‘lmaydi”.

Rustam Sa'diyev “tadbirkor kinochilar”, degan jumlani suhbat davomida aytib o‘tdi. Bu atama tabiiyki o‘z sababiga ega edi...

“O‘zbekkino” Milliy agentligiga biror bir filmni ishlash uchun uning ssenariysini olib borishadi”, dedi rejissyor. “Stsenariy agentlik qoshidagi maxsus komissiyadan o‘tmasa, boshqa yo‘llarini qidirib qolishadi. Yoki tadbirkorning huquqi poymol bo‘layapti, deb jar solishadi. Mahsulot qanday shaklda bo‘lmasin, uni chiqarishdan oldin, albatta, yaroqliligi tekshiriladi. Kino bu tovar emas, san'at. Ideologiyaga, inson tafakkuriga xizmat ko‘rsatuvchi vosita-ku... Meni tashvishlantirayotgan narsa, ana shunday yo‘llar bilan katta bir audiyatoriyani zaxarlashayotganidir”.

Rustam Sa'diyevning fikricha film suratga olish uchun aynan shu soha mutaxassisi bo‘lish lozim. 

“Tasavvur qiling, Texnika universitetini bitirgan ham, Sharqshunoslikni tugatgan ham, shu sohadan dars olmagani ham kino olaversa nima bo‘ladi? Davlat katta etib San'at institutini qurib qo‘yibdi. U yerdagi Kino fakulteti alohida ishlayapti. Shu dargohlarni o‘qib chiqish kerakmi? To‘g‘risini aytganda kinodan professionalizm yiroqlashdi. Misol uchun: “Aka, men bir tadbirkorman, kino olgandim”, deb kelishadi. “Qayerni bitirgansiz?”. “Shu... paxtachilik institutini...”. Hayron qolasan... nega kinochilar tibbiyotchilik bilan shug‘ullanishmaydi, nega odamlarni davolab ketaverishmaydi?.. Chunki har kim o‘z ishini qilishi kerak”.

Suhbat davomida ko‘pgina keskin fikrlar bildirildi. O‘zbek kinosining bugungi holati va istiqboli haqida xolis fikrlar yuritildi. Ushbu videosuhbatning to‘liq shakli bilan Kun.uz’ning Youtube servisidagi kanalida va TAS-X tizimida ishlovchi Mover.uz sayti orqali tanishishingiz mumkin.

                                                                                                                                                                                               Xurshid Daliyev suhbatlashdi

{Yii::t(}

O'tkazib yuborish 6s

O'tkazib yuborish

Tas-IX`da ko‘rish