Malayziya Shimoliy Koreya yetakchisining akasi jasadini berishi shartini ma'lum qildi

Malayziya Shimoliy Koreyaga ushbu mamlakat yetakchisi Kim Chen Inning Kuala-Lumpurda vafot etgan akasi Kim Chen Namning jasadini u yorib ko‘rilgach topshirishini ma'lum qildi. Bu haqda mahalliy Star nashri xabar bermoqda. 

"Biz jasadning topshirilishi haqida Shimoliy Koreya elchixonasidan murojaat oldik. Biroq biz buni qilishdan avval jasadni yorib ko‘ramiz", deb aytdi Malayziya politsiyasi vakili Fozil Ahmad.

Nashr ma'lumotlariga ko‘ra, 6 fevraldan Malayziyada bo‘lgan Kim Chen Namning jasadini 15 fevralda yorish rejalashtirilgan. Hozirda politsiya marhumning Malayziya bo‘ylab harakatlangani va aloqalarini o‘rganmoqda.   

Shimoliy Koreya yetakchisining akasi 13 fevralda Makaoga uchadigan samolyotga o‘tirishi kerak bo‘lgan, biroq o‘zini to‘satdan yomon his qila boshlagan. Turli taxminlarga ko‘ra, unga zaharlangan ignalar bilan jarohat yetkazilgan bo‘lishi, zaharli suyuqlik sepib yuborilgan yoki yuziga qandaydir moddaga bo‘ktirilgan latta bilan yurgazilgan bo‘lishi mumkin.  

Shundan keyin jabrlanuvchi aeroport tibbiyot punktiga joylashtirilgan va shahardagi shifoxonalardan biriga olib ketilayotganda vafot etgan.

Ko‘rinishicha, Kim Chen Nam boshqa nom bilan sayohat qilgan, uning yonidan 1970 yilda Pxenyanda tug‘ilgan Kim Chol nomiga olingan pasport bo‘lgan. 

Kim Chen Nam Shimoliy Koreyani ancha yil avval tark etgan bo‘lib, Makaoda yashab, biznes bilan shug‘ullangan. Bir vaqtlar u Shimoliy Koreyaning sobiq rahbari, otasi Kim Chen Irning ehtimoliy vorisi sifatida e'tirof etilgandi, biroq bu nomga uning kichik ukasi Kim Chen In sazovor bo‘lgan.