Iroq Mo‘sulning g‘arbini ozod qilish uchun yurish boshladi

Iroq bosh vaziri Haydar al-Obodiy hukumat qo‘shinlari Mo‘sulning g‘arbiy qismini IShIDdan ozod etish uchun harbiy yurish boshlangani haqida e'lon qildi.

«Bizning qo‘shinlarimiz shaharni IShIDdan to‘la ozod etish uchun harbiy harakatlarni boshladi», degan u televideniye orqali chiqishida.

Iroq hukumati armiyasi shaharning g‘arbiy qismini qamalda tutib turgandi. Shuningdek, AQSh rahbarligidagi aviatsiya samolyotlari IShID pozitsiyalarini havodan turib bombardimon qilib kelmoqda.

BMT bu harbiy amaliyot vaqtida tinch aholi xavfsizligini ta'minlashni so‘ragandi.

Bu amaliyot tufayli 400 mingdan ortiq qochqin paydo bo‘lishi mumkinligidan ogohlantirilgan.

18 fevral kuni Reyter agentligi shahar ustida uchgan samolyotlar varaqalar tashlab, aholini hujum haqida ogohlantirgani va ulardan shahardan chiqib ketish so‘ralgani haqida xabar berdi. Varaqalarda shuningdek, IShID jangarilari qurollarni tashlab, taslim bo‘lishga chaqirilgan.

Mo‘sulni ozod qilish uchun quruqlikdagi harbiy harakatlar o‘tgan yilning 17 oktabrida boshlangandi. Unda Iroq armiyasidan tashqari, kurd harbiy bo‘linmalari va shia ko‘ngillilari ishtirok etmoqda. 2017 yilning 18 yanvariga kelib, Iroqdagi kattaligi bo‘yicha eng yirik ikkinchi shahar bo‘lgan Mo‘sulning sharqiy qismi to‘la ozod etilgandi.