Lavrov: «… o‘z-o‘zidan ijaraga olishning umuman imkoni yo‘q»

Rossiya tashqi ishlar vaziri Sergey Lavrov Ukraina Oliy radasi deputati Andrey Artemenkoning Moskvadan sanksiyalarni olish va Qrimni ijaraga berish «reja»siga fikrini bildirdi. 

«Bunga izoh berishim mushkul, chunki o‘z-o‘zidan ijaraga olishning hech ham iloji yo‘q», — degan Rossiyaning bosh diplomati.

Uning so‘zlariga ko‘ra, bu kabi rejalar «shuni ko‘rsatmoqdaki, o‘yin qoidalarini qayta yozib chiqishga urinishlar bo‘ladi».

«Bularning bari istar-istamas, 2015 yil fevralida Minskda erishilgan kelishuv shartlaridan e'tiborni chalg‘itadi. Bu kelishuvning esa boshqa muqobili yo‘q», — deb ta'kidlagan Lavrov.

Avvalroq, The New York Times gazetasi xabariga ko‘ra, AQSh prezidentining milliy xavfsizlik bo‘yicha sobiq maslahatchisi Maykl Flinnga, u iste'foga chiqmasdan avvalroq, Rossiyaga qarshi sanksiyalarni bekor qilishga doir reja taqdim etilgan. Uni tuzishda Ukraina parlamenti deputati Andrey Artemenko muhim o‘rin tutgan. 

Artemenkoning hikoya qilishicha, reja bandlari orasida — «Donbassning Ukraina tarkibiga qaytishi», Ukrainaning neytral maqomini tasdiqlash kabilar bor. U NATO, YeI va Bojxona ittifoqining hech biriga qo‘shilmaydi. 

Bundan tashqari, Ukrainada Qrimni Rossiyaga 30-50 yilga ijaraga berish ko‘zda tutilgan. Bu muddat poyoniga yetgach, Qrim yarim orolida uning kimga tegishli bo‘lishiga oydinlik kirituvchi so‘nggi referendum o‘tkaziladi.