Putin Suriyadagi operatsiyaga aloqador bo‘lgan bir qator generallarning unvonini oshirdi

Rossiya prezidenti Vladimir Putin harbiy-koinot kuchlarining Suriyadagi operatsiyasiga aloqador bo‘lgan yoki Suriya bo‘yicha muzokaralarda ishtirok etgan bir qator armiya generallariga yangi unvonlar berdi. 

Putin farmoniga ko‘ra, Rossiya qurolli kuchlari bosh shtabi bosh tezkor boshqarmasi boshlig‘i Sergey Rudskoy general-polkovnik unvonini oldi. Xuddi shu unvon Rossiya mudofaasini boshqarish milliy markazi boshlig‘i Mixail Mizintsevga berildi.

Bundan tashqari, uzoq aviatsiya qo‘mondoni Sergey Kobilash va Rossiya qurolli kuchlari bosh shtabi bosh tezkor boshqarmasi boshlig‘i o‘rinbosari Stanislav Gadjimagomedov yangi unvonlar oldilar. Ostonada Suriya muxolifati bilan muzokaralarda Rossiya mudofaa vazirligi delegatsiyasiga boshchilik qilgan Gadjimagomedov general-leytenant unvonini oldi. Yangi unvonlar olgan generallar ro‘yxatida umumiy hisobda 17 ta familiya bor.

Suriyadagi operatsiyaning natijalaridan biri 3119 terrorchi, jumladan 29 nafar dala qo‘mondonining yo‘q qilinishi bo‘ldi. Rossiya harbiy-koinot kuchlari Suriyadagi operatsiya boshidan 1760 ta jangovar parvoz amalga oshirgan.