Rossiyada 8 yoshli qahramon Xizir Derbichevning jasadi topildi

Rossiyaning Ingushetiya Respublikasidagi Sunja daryosida cho‘kib ketgan 8 yoshli Xizir Derbichevning jasadi qidiruv-qutqaruv operatsiyasining sakkizinchi kuni topildi.

Respublika hukumati ma’lumotlariga ko‘ra, Xizirning jasadi 22 iyun kuni topilgan. Shundan so‘ng, FVV qidiruv-qutqaruv ishlari yakunlanganini e’lon qildi.

Fojia 15 iyun kuni sodir bo‘ldi. OAV ma’lumotlariga ko‘ra, Xizir ikki do‘sti bilan Sunja daryosi bo‘yida bo‘lgan. Bolalardan biri, Adam sirpanib suvga tushib ketgan va shox yoki daraxt ildizlariga ilinib qolgan. Xizir unga yordamga shoshilgan, lekin o‘zi oqimga bardosh berolmay, oqib ketdi. Uchinchi bola kattalarni chaqirdi va Adam qutqarildi.

Bu voqea katta shov-shuvga sabab bo‘ldi. Xizirni kichik qahramon deb atay boshladilar: odamlar u 8 yoshida kattalardek harakat qilganini, qo‘rqmaganini va do‘stini qutqarishga harakat qilganini aytdi.

Xizirni minglab odamlar: qutqaruvchilar, ko‘ngillilar va mahalliy aholi, shuningdek, Checheniston, Dog‘iston, Shimoliy Osetiya, Kabarda-Bolqor, Qorachoy-Cherkesiyadan kelgan ko‘ngillilar qidirdi.

Operatsiya ishtirokchilari Sunja o‘zani, qirg‘oqlari va unga tutash hududlarni ko‘zdan kechirdi. Ishlar ob-havo sharoiti tufayli qiyinlashdi: yomg‘irdan keyin suv sathi ko‘tarilib, oqim kuchaygan edi.

Qayd qilinishicha, bolaning jasadi oilasiga topshirildi. U o‘z qishlog‘ida dafn etiladi.