Londonda olomon avtomobilda bosib ketildi

Londonning janubida haydovchi avtomobilda bir guruh piyodalarni bosib, yo‘l chetidagi panjaraga borib urildi. The Telegraph nashrining ma'lum qilishicha, voqea 26 fevralda Bellingem tumanida yuz bergan.

Avariya oqibatida 5 kishi jarohat olgan va shifoxonaga olib ketilgan. Shahardagi favqulodda hodisalar haqidagi ma'lumot chop etiluvchi @Kent_999s tvitter-akkauntida ma'lum qilinishicha, 3 kishi – ikki erkak va bir ayol og‘ir ahvolda. 

Daily Star nashrining ta'kidlashicha, avtomobil haydovchisi mashinani xavfli haydash gumoni bilan hibsga olingan. Ma'lum qilinishicha, u mast holatda bo‘lgan. 

25 fevralda shunga o‘xshash voqealar Germaniyaning Geydelberg shahrida hamda AQShning Yangi Orlean shahrida yuz berdi. Geydelbergdagi hodisada haydovchi bir guruh odamlarni bosib ketishi oqibatida 3 kishi jarohatlandi. Erkak voqea joyidan yashirinmoqchi bo‘lganda, politsiya tomonidan qo‘lga olingan. Yangi Orleandagi fojiada mast holatda bo‘lgan yosh yigit odamlarni bosib ketishi oqibatida 50 ga yaqin kishi jarohatlangan.