Malayziyada Saudiya Arabistoni qirollik oilasiga hujumning oldi olindi

Malayziya politsiyasi mamlakatga Saudiya Arabistoni qiroli tashrifidan avval qo‘lga olingan yetti nafar inson “arab davlatlaridan birining” qirollik oilasi a'zolariga hujum qilmoqchi bo‘lganligini ma'lum qildi. Bu haqda Reyter agentligi xabar bermoqda.

"Ular arab qirollik oilasi a'zolariga Kuala-Lumpurga tashrifi chog‘ida hujum qilishni rejalashtirgan. Biz ularni so‘nggi lahzalarda qo‘lga oldik", - deya ma'lum qildi politsiya vakili Holid Abu Bakar jurnalistlarga. U gap aynan qaysi arab davlati haqidagi borayotganiga aniqlik kiritmadi.

Agentlik ma'lumotiga ko‘ra, qo‘lga olish jarayoni 21-26 fevral kunlari o‘tkazilgan. Saudiya Arabistoni qiroli Salmon bin Abdul Aziz Al Saud esa Malayziyaga 26 fevral kuni tashrif buyurgan.

Yakshanba kuni Malayziya politsiyasi IShID va boshqa terrorchilik guruhlari bilan aloqadorlikda gumonlangan yetti kishini qo‘lga oldi. Politsiya ma'lumotiga ko‘ra, qo‘lga olinganlarning ikki nafari IShID bilan aloqador bo‘lgan va Malayziya hududida teraktlarni amalga oshirishni rejalashtirgan.