AQShdagi Argon milliy laboratoriyasidan bo‘lgan Set Darling va uning hamkasblari neftni o‘zining og‘irligidan 90 bora ko‘proq qabul qiluvchi yangi materialni yaratishdi. Shuningdek uni osonlik bilan siqish va qaytadan ishlatish mumkin. Yangi loyiha Oleo Sponge deb ataladi hamda olimlarning ishontirishicha, uning yordamida neft to‘kilishi muammosini osonlik bilan bartaraf etish mumkin.
Yangi gubkaning asos materiali – universal penopoliuretan bo‘lib, u suyuqlikni qabul qilib olishga juda mos tushadi. Bundan tashqari, olimlar gubka ichida oleofil materialining o‘ta ingichka qatlamini yaratishdi, buning yordamida u neftdan boshqa mahsulotlarni ham o‘ziga singdira oladi.
Oleo Sponge dekabr oyi boshidagi sinovdan o‘tkazish jarayonida dizel yoqilg‘isi va xom neftni suvdan muvaffaqiyatli ravishda o‘ziga singdirib oldi. Olimlarning fikricha, bu material qirg‘oqlardagi neft to‘kilishlarida ayniqsa qo‘l keladi, u yerda tozalash ishlari ancha murakkablik tug‘diradi. Kelajakda gubka yanada kattaroq missiyalar uchun o‘zgartirilishi mumkin.
