Turkiya - Niderlandiya: Turklar 100 yil oldingi Usmoniylar yordamini ham yodga olishdi

Usmoniylar imperiyasi sultoni Mehmed V Reshad 1916 yilda, Birinchi jahon urushidagi og‘ir shart-sharoitlarga qaramay, Niderlandiyaga yordam qo‘lini cho‘zgan. Usmoniylar davlati arxivlari ma'lumotlari shundan dalolat beradi. Turkiyaning "Anadolu" agentligi shu mavzudagi maqolasi bilan moziyga ishora qildi. 

Xususan, 1916 yilning 30 yanvarida Usmoniylar davlati parlamenti suv toshqinidan jabrlangan Niderlandiya aholisiga yordam ko‘rsatishni ko‘zda tutuvchi qonun loyihasini qabul qilgan. 

Usmoniylar davlati hujjatlariga muvofiq, Niderlandiya aholisi ehtiyojlari uchun 25 ming kurush (Usmoniylar davridagi kumush tangalar) ajratilgan.

Bundan tashqari, arxiv ma'lumotlarining guvohlik berishicha, Niderlandiya Usmoniylar davlatiga telegraf orqali minnatdorchilik bildirgan.