Atambayev xorijda ishlovchi qirg‘izistonliklar davlat ko‘magini his qilishlari kerakligini aytdi

Qirg‘iziston prezidenti Almazbek Atambayev Qirg‘iziston migratsiya davlat xizmati raisi Medetbek Aydaraliyev bilan uchrashuvda xorijda ishlovchi qirg‘izistonliklar davlat ko‘magini his qilishlari kerakligini aytdi.

Ta'kidlanishicha, uchrashuv vaqtida Aydaraliyev xorijda ishlayotgan qirg‘izistonliklarni qo‘llab-quvvatlash bo‘yicha ishning yangi yo‘nalishlari haqida so‘zlab bergan. Gap birinchi navbatda Yevrosiyo iqtisodiy ittifoqida ishlovchi qirg‘izistonliklarni qo‘llab-quvvatlash haqida bormoqda. 

Atambayev xorijda ishlovchi qirg‘izistonliklar o‘zlarining ijtimoiy-huquqiy muammolarini hal qilishda davlat ko‘magini his qilishlari hamda o‘z huquq va majburiyatlarini bilishlari kerakligini aytdi. U qirg‘iz muhojirlarining huquqlari va manfaatlarini samarali himoya qilish bo‘yicha barcha kompleks chora-tadbirlar faollashtirilishi zarurligini ta'kidlab o‘tdi.