Rossiyada suv bosgan yo‘l asfalt qilindi

Ijtimoiy tarmoqlarda Novorossiysk kommunal xizmatlari kuchli yomg‘ir ostida asfaltni ko‘lmakka yotqizayotganiga doir videolavha paydo bo‘ldi.

Hodisa 1905 yil inqilobi ko‘chasida kuzatilgan. Unda yo‘lsozlar mehnat quroli bilan yo‘lni suvdan xoli qilishga urinishlarini ko‘rish mumkin.

Videolavhaga shahar hokimi Igor Dyachenko e'tibor qaratgan. U kommunal xizmatchilar ishidan g‘azablangan.

"Shahrimiz aholisi kabi meni ham 1905 yil inqilobi ko‘chasida asfalt yotqizish jarayoni g‘azablantirdi. Tekshiruvlardan so‘ng, ma'muriyatning ushbu mantiqsizlikka yo‘l qo‘ygan barcha rahbar xodimlarini jazolashga ko‘rsatma berdim", — deb yozgan Dyachenko Twitter sahifasida.

Dyachenko, shuningdek, shaharga nisbatan buday munosabatda bo‘lish mumkin emasligini hamda yo‘l pudratchi hisobidan qayta ta'mirlanishini aytgan.