Yaman prezidenti Eronni terrorchilikni qo‘llab-quvvatlashda aybladi

Yaman prezidenti Abd Rabbo Mansur Hodiy Eronni Yaqin Sharq mintaqasida terrorchilikni ochiqchasiga qo‘llab-quvvatlashda aybladi. Uning aytishicha, Tehron "mintaqada harakat qiluvchi terrorchilik guruhlariga ko‘mak beradi".

"Husiylar otryadlari Eron ko‘magida Yamandagi mavjud vaziyatni o‘zgartirishga harakat qilmoqdalar, bunga esa Yaman hukumati aslo yo‘l qo‘ymaydi", deb aytdi Hodiy Iordaniyada o‘tayotgan Arab davlatlari ligasi sammitidagi uchrashuvda. Uning aytishicha, husiylarning "Ansorulloh" harakati tarafdorlari Yaman jamiyatidagi ijtimoiy tuzumni to‘liq barbod qilgan, iqtisodiyot va davlatchilikning vayron bo‘lishiga sabab bo‘lgan. Hodiyning aytishicha, Yamanda tinchlik haqida gapirish uchun husiylar "qurolni tashlab, egallab olgan shaharlaridan chiqib ketishi va siyosiy partiyaga aylanishi" kerak. 

Arab davlatlari ligasining joriy 28-sammiti Iordaniya qirolligi poytaxti Ammandan 50 km uzoqlikda, O‘lik dengiz sohilida o‘tmoqda va oxirgi yillardagi eng yirik sammit bo‘lmoqda, unda 18 arab yetakchisi qatnashmoqda. Falastin masalasi, inqiroz girdobida qolgan Suriya, Liviya va Yamandagi vaziyat, terrorchilikka qarshi kurash, Yaqin Sharqdagi qochqinlar muammosi hamda "Eron aralashuviga" qarshi turish sammitda muhokama qilinadigan asosiy mavzular bo‘ladi.