Dushanba kuni Ho‘rmuz yaqinida AQSh armiyasining «Apache» zarbdor vertolyoti qulagani haqida xabarlar tarqalgandi. Keyinroq AQSh prezidenti Donald Tramp bu halokatni tasdiqladi. Tramp shundan so‘ng «Apache» vertolyoti urib tushirilganini javoban Eronga zarbalar berilganini ma’lum qildi.
«Menimcha, javob juda kuchli va shiddatli bo‘lishi kerak edi, mana shu zarba aynan shunday bo‘ldi», dedi Tramp seshanba kuni ABC News telekanaliga bergan intervyusida.
Reutersʼning yozishicha, AQShning so‘nggi zarbalari taxminan to‘rt soat davom etdi. AQSh Markaziy qo‘mondonligi chorshanbaga o‘tar kechasi operatsiya yakunlanganini ma’lum qildi. AQSh rasmiysining so‘zlariga ko‘ra, Eronning 20 ga yaqin nishoniga zarba berilgan.
Eron davlat OAVlari Ho‘rmuz bo‘g‘ozidagi Keshm oroli va Sirik port shahriga hujum qilinganini xabar qildi. Mahalliy aholiga ko‘ra, yaqin atrofdagi Bandar-Abbosda, keyinchalik esa bo‘g‘ozga kirish qismidagi Jask hududida portlash tovushlari eshitilgan.
AQSh harbiylariga ko‘ra, hujumlarda bo‘g‘oz yaqinidagi Eron havo mudofaasi, yer usti boshqaruv stansiyalari va kuzatuv radar obektlari nishonga olingan.
Eron javob zarbalari
Eron Islom inqilobi muhofizlari korpusi chorshanba kuni Amerika zarbalariga javoban Iordaniyadagi AQSh bazasi va Fors ko‘rfazidagi 21 ta turli nishonlarga hujum uyushtirdi.
Xususan, Eron tomoni Iordaniyadagi AQShning «Al-Azraq» bazasidagi to‘rtta obektni uzoq masofali raketalar bilan nishonga olganini bildirgan. Nishonlar orasida F-35 qiruvchi samolyotlari angarlari va qo‘mondonlik-boshqaruv markazi ham borligi aytilmoqda. Muhofizlar korpusi AQShning har qanday keyingi hujumiga «qaqshatqich va hal qiluvchi» javob berishga tayyor ekani haqiqda ogohlantirdi.
