Fransiyada prezidentlik saylovidan avvalgi sokinlik kuni boshlandi

Fransiya prezidentlik saylovining birinchi bosqichidan avvalgi saylovoldi tashviqot kampaniyasi poyoniga yetdi. 22 aprel kuni sokinlik kuni deb e'lon qilingan. 23 aprelda saylovning birinchi turi bo‘lib o‘tadi. 

Fransiya Saylov kodeksiga ko‘ra, shu kundan e'tiboran, prezidentlikka nomzodlar saylovoldi mitinglari o‘tkaza olishmaydi, OAVga intervyu berishlari yoki boshqa ko‘rinishda tashviqot ishlari olib borishlari mumkin emas. OAV esa, fransuz saylovchilarining fikriga ta'sir o‘tkazadigan ma'lumotlarni e'lon qilishi taqiqlanadi. Shunday qilib, 45 mln fransuz saylovchisiga tinch vaziyatda umummilliy ovoz berish jarayoniga tayyorgarlik ko‘rish imkoni taqdim etildi. 

Ijtimoiy fikrni o‘rganish maqsadida o‘tkazilgan so‘nggi so‘rov natijalariga ko‘ra, saylovoldi poygasida "Marshda" harakatining yosh rahbari Emmanuel Makron yetakchilik qilmoqda. Birinchi turda unga 23 foiz saylovchi ovoz berishga tayyor. Rasman u partiyasiz mustaqil nomzod sifatida kurash olib borayapti. Biroq, hukmron sotsialistik partiyaning qator vazirlari uni qo‘llab-quvvatlashlarini bildirishdi. Shu sababli, OAV Makron ortida bevosita Yelisey saroyi turibdi, degan fikrni ilgari surmoqda. 

"Milliy front" rahbari Marin Le Pen Makron bilan derli bir xil natijani ko‘rsatishi mumkin. Unga birinchi turda 22 foiz saylovchi ishonch bildirishi kutilmoqda. Tahlilchilarning fikricha, aynan shu ikki nomzod ikkinchi turda Yelisey saroyi uchun kurash olib boradi. 

Ekspertlarga ko‘ra, Fransiyadagi bu safargi saylovlarning o‘ziga xosligi shundan iboratki, unda yakuniy qarorga kelmagan saylovchilar ko‘pchilikni tashkil etadi. Fransiyadagi ovoz berish huquqiga ega fuqarolarning qariyb 1/3 qismi, ya'ni salkam 15 million nafari 23 aprelda kimga ovoz berishi haqida to‘xtamga kelmagan. 

Ijtimoiy so‘rovlarda 20 foiz ishonch bildirilgan Fiyon yoki 19 foiz ishonch bildirilgan Melanshon ham ikkinchi turga yo‘l olish ehtimoli yuqori.