Pentagon: IShIDning Afg‘onistondagi yetakchisi yo‘q qilingan bo‘lishi mumkin

Afg‘onistonda IShID terrorchilik guruhi bo‘limining yetakchisi 27 aprelda AQSh va afg‘on xavfsizlik kuchlarining maxsus operatsiyasida o‘ldirilgan bo‘lishi mumkin. Bu haqda Pentagon rasmiy vakili Jyeff Devis ma'lum qildi. 

"Operatsiyadan maqsad IShIDning Afg‘onistondagi amiri Abdul Hasibni yo‘q qilish bo‘lgan. Bizda u yo‘q qilinganining isboti yo‘q, biroq u nishonga olingan. Biz u operatsiya vaqtida o‘ldirilgan bo‘lishi mumkinligini taxmin qilmoqdamiz", deb aytdi Devis matbuot-anjumanda. 

Devisning aytishicha, operatsiyada 50 nafar amerikalik reynjyer va 40 nafar afg‘on harbiysi ishtirok etgan. Shuningdek, Nangarhor viloyatida o‘tgan operatsiya vaqtida IShIDning 35 jangarisi, jumladan bir necha qo‘mondoni yo‘q qilingan.