Bugun Toshkentning markaziy qismida katta tirbandliklar yuzaga keldi. Bu O‘zbekiston Kasaba uyushmalari federatsiyasi kengashi tomonidan tashkillashtirilgan "Salomatlik sari" respublika ommaviy yugurish tadbiri bilan bog‘liq. U bugun ertalab soat 8.00da Mirobod tumanidagi Oybek va Nukus ko‘chalari chorrahasidan boshlandi.
Kasaba uyushmalari federatsiyasi ma'lumotiga ko‘ra, yugurish tadbiri Afrosiyob, Sharof Rashidov, Islom Karimov ko‘chalari bo‘ylab Alisher Navoiy nomidagi Davlat akademik katta teatrigacha bo‘lgan masofada o‘tkazildi va Toshkent univermagi oldida o‘z yakuniga yetadi.
Ko‘pchilik haydovchilar bu borada o‘z fikrlarini bildirishdi hamda ularning aksariyati hazil kayfiyatida bo‘lgan.
"Zombilar kelmoqda. Eshiklarni berkitib, aloqada bo‘lib turing. Shahardagi vaziyatdan xabardor qilib turamiz", - deb yozgan ulardan biri.
"Konvertatsiya ochilibdi, hamma pul almashtirgani yuguryapti", — degan boshqa biri.
