Toshkent shahri tarkibiga o‘tgan mahallalarda infratuzilma bo‘yicha birorta masala qolmasligi kerak - prezident

Shavkat Mirziyoyev Toshkent viloyatidan Sergeliga qo‘shilgan 13 ta mahallada haligacha ko‘chalar yoritilmayotganini tanqid qilib, mas’ullarga yechim uchun 10 kun muhlat berdi. Topshiriqqa ko‘ra, bu mahallalar yil oxirigacha kanalizatsiyaga to‘liq ulanishi kerak. Umuman, poytaxtning beshta tumaniga o‘tkazilgan 46 ta mahallada elektr, suv, kanalizatsiya va yo‘l bo‘yicha birorta masala qolmasligi kerak, dedi prezident.

Foto: Prezident matbuot xizmati

Toshkent viloyati hududidan olti yil oldin Sergeliga qo‘shilgan 13 ta mahallada 14,5 ming xonadon bor, ularda 50 mingdan ortiq aholi yashaydi. Lekin bu hududlar aholisi haligacha shahar muhitini to‘liq his qilgani yo‘q, dedi prezident Shavkat Mirziyoyev 4 iyun kuni Sergeliga tashrifi vaqtidagi yig‘ilishda.

Davlat rahbariga ko‘ra, mazkur mahallalarda yoritish uchun 629 ta temir-beton ustun o‘rnatilib, kabel tortilgan. Ammo tizim hali ishga tushmagani tanqid qilindi. Mutasaddilarga 10 kun muddatda ushbu masalani hal qilish topshirildi. Shuningdek, yil yakunigacha ushbu mahallalarni kanalizatsiya tarmog‘iga to‘liq ulash vazifasi qo‘yildi.

Sergeli tumanida aholi va tadbirkorlarning soni oshgani sababli elektr energiyasiga yillik talab besh yilda 40 foizga ko‘paydi. Ayrim mahallalarda elektr kuchlanishi me’yordan 1,5-2 barobar pastligi qayd etildi.

“Shaharoldi”, “O‘zgarish” va “Qumariq” nimstansiyalarini ishga tushirish uchun jami 107 milliard so‘m ajratilgan. Mutasaddilarga ushbu obektlarni aniq muddatlarda ishga tushirish va aholiga kafolatli elektr ta’minotini yo‘lga qo‘yish vazifasi qo‘yildi.

Umuman, poytaxtning Bektemir, Mirzo Ulug‘bek, Sergeli, Yashnobod va Yangihayot tumanlariga o‘tgan 46 ta mahallada elektr, suv, kanalizatsiya va yo‘l bo‘yicha birorta hal etilmagan masala qolmasligi kerakligi ta’kidlandi.