Duterte Trampning AQShga kelish taklifiga hozircha bandligi bilan javob berdi

Filippin prezidenti Rodrigo Duterte AQSh prezidenti Donald Trampning AQShga kelish taklifi haqida o‘ylab ko‘rishini va hali bir to‘xtamga kelmaganini aytdi. Bu haqda GMA News nashri xabar bermoqda. 

Duterte Trampning taklifiga rejalashtirib qo‘yilgan safarlar u uchun ustuvor ekanligi hamda jadvali juda ziqligi bilan javob bergan. "Men juda bandman. Men aniq va'da berolmayman, men Rossiyaga, Isroilga borishim kerak", deb aytdi Duterte jurnalistlarga. 

Nashrning ta'kidlashicha, Duterte Isroilga safar qilishi haqida birinchi bor aytib o‘tdi. Dutertening aytishicha, u Rossiyaga may oyida boradi. 

1 may kuni Tramp Filippin prezidentini AQShga taklif qilib, davlat departamentini g‘aflatda qoldirgani va endi AQSh ma'muriyati huquqni himoya qilish tashkilotlari tomonidan tanqidga uchrashga tayyorlanayotgani ma'lum qilingandi.

29 aprelda ikki yetakchi telefon orqali muloqot qilishgan.