Qoʻshimcha funksionallar
-
Tungi ko‘rinish
Tramp: Putin G20 sammitiga kelsa, foydali bo‘ladi
AQSh prezidenti Donald Tramp Vladimir Putinning Mayamida bo‘lib o‘tadigan G20 sammitida ehtimoliy ishtiroki “foydali” bo‘lishini aytdi, biroq Rossiya ushbu sammitga taklif qilingani haqida hech narsa bilmasligini bildirdi.
AQSh prezidenti Donald Tramp 2026 yil dekabr oyida Mayamida bo‘lib o‘tadigan “Katta yigirmatalik” — G20 sammitida rossiyalik hamkasbi Vladimir Putinning ishtirok etishi “foydali” bo‘ladi, deb hisoblaydi. Shu bilan birga, u Rossiya ushbu sammitga taklif qilingani haqida bilmasligini va Putin unda ishtirok etishiga shubha qilishini 23 aprel, payshanba kuni ma’lum qildi.
Avvalroq shu kuni The Washington Post gazetasi Donald Tramp Vladimir Putinni bo‘lajak “yigirmatalik” sammitiga taklif qilish niyatida ekanini xabar qilgan edi.
AFP agentligiga ko‘ra, shu orqali AQSh prezidenti Rossiya 2022 yilda Ukrainaga bostirib kirishi oqibatida duch kelgan xalqaro yakkalanishni “yanada yumshatish” bo‘yicha sa’y-harakatlarini davom ettirmoqchi.
Biroq Rossiya prezidenti matbuot kotibi Dmitriy Peskov Putinning G20 sammitida ishtirok etishi bo‘yicha qaror hali qabul qilinmaganini bildirdi.
Rossiyaning RIA “Novosti” agentligi RF tashqi ishlar vaziri o‘rinbosari Aleksandr Pankinga tayanib, Moskva “eng yuqori darajada ishtirok etish” uchun taklif olganini yozdi.
“Ammo sana yaqinlashganda ko‘ramiz. Ungacha nima bo‘lishini xudo biladi”, — deya diplomat so‘zlarini keltiradi jurnalistlar.
Avvalroq Donald Tramp Mayamidagi sammitda ishtirok etish uchun O‘zbekiston va Qozog‘iston yetakchilarini taklif qilganini aytgan edi.
