Internetda "Aeroflot" aviakompaniyasining Moskva-Bangkok reysini amalga oshirgan samolyotining kuchli turbulentlik zonasiga tushishidan keyin samolyot ichidagi holat tasvirlangan video paydo bo‘ldi.
Videoda o‘rindiqlar orasidagi yo‘laklarda odamlar yotganini, hammayoq alg‘ov-dalg‘ov, buyumlar sochilib yotganini ko‘rish mumkin. Ba'zi odamlar o‘z joylarida o‘tiribdilar.
Rossiyaning Tailanddagi elchixonasi ma'lumotlariga ko‘ra, favqulodda vaziyat oqibatida 27 kishi jarohat olgan, ulardan 24 nafari rossiyaliklar. Jarohatlanganlar qo‘l-oyoq, umurtqa suyaklari sinishi, lat yeyish jarohatlari olganlar. Ular shifoxonalarga yetkazilganlar.
"Aeroflot" ma'lumotlariga ko‘ra, voqea samolyot qo‘nishidan 40 daqiqa oldin yuz bergan. Meteorologik lokator turbulentlik yaqinlashayotganini qayd qila olmasligi sababli, ekipajda yo‘lovchilarni o‘z joylarini egallashlari kerakligini aytish imkoniyati bo‘lmagan. Samolyot Moskva vaqti bilan soat 3:38da Bangkok aeroportiga qo‘ngan.
