Qirg‘izistonda ko‘chkida halok bo‘lganlar yaqinlariga moddiy yordam ajratildi

Qirg‘iziston prezidenti Almazbek Atambayev O‘sh viloyati, O‘zgan tumanidagi Ayu qishlog‘ida yuz bergan ko‘chkida halok bo‘lganlar qarindoshlariga moddiy yordam ajratishga ko‘rsatma berdi. Bu haqda prezident ma'muriyati axborot siyosati bo‘limida ma'lum qilindi.  

Ta'kidlanishicha, Prezidentning ijtimoiy himoya jamg‘armasidan moddiy yordam ko‘rsatish uchun 700 ming som ajratilgan. Ko‘chkida halok bo‘lgan R.J.Abdrazakova, F.A.Qamchiyev, I.N.Qorgonbayev, M.N.Qorgonbayev, A.X.Razabayev, M.X.Razabayeva, X.Razabayevning qarindoshlari 100 ming somdan moddiy yordam olishadi.

Eslatib o‘tamiz, 29 aprel Ayu qishlog‘ida 200 ming kub metr hajmda ko‘chki yuz bergan. Buning oqibatida ko‘chki ostida 24 kishi qolib ketgandi.