10:06 / 05.05.2017
22575

Toshkentda departament soxta xodimi qo‘lga olindi

Foto: RIA "Novosti"

Dushanba kuni erta bilan dorixonaga kirib kelgan kishi peshtaxtalarni biroz kuzatib turdi-da, sotuvchidan bir juft rezina qo‘lqop berishni so‘radi. Pulini to‘lab, qo‘lqoplarni qo‘liga olgach, u yoq-bu yog‘iga nazar tashladi va sertifikati bor-yo‘qligini so‘radi. Sotuvchi bu haqda bilmasligini aytib, dorixona mudirini chaqirib chiqdi, deb yozadi “Huquq” gazetasi.

Dorixona mudiri nima gapligini so‘ragach, sertifikatni berolmasligini ma'lum qilgan edi, zumda xaridorning avzoyi o‘zgardi. Mudirga savdo qoidalarini buzayotganligi haqida dashnom berdi. Keyin esa shu sababli dorixona faoliyatini tekshirishi lozimligi haqida jiddiy ohangda gap boshlab, kelasi safar kelganida tegishli hujjatlarni ham ko‘rsatishini ma'lum qildi va o‘zining telefoni raqamini yozib berdi. Dorixona mudirining esa nima qilishni bilmay, boshi qotdi.

Darhaqiqat, u so‘zining ustidan chiqib, ertasi kuni dorixonaga kirib keldi. Mudirni chaqirib, salom-alik qilgach, salobat bilan kecha birrovga kirib ketganini eslatdi. So‘ngra o‘zini prokuratura huzuridagi departament xodimi G‘aybulla Salomov (ism-familiyalar o‘zgartirilgan), deya tanishtirib, savdo qoidalari buzilganligini aytib, shu holat yuzasidan tekshirish o‘tkazish uchun kelganini ta'kidladi.

Dorixona mudiri kecha dabdurustdan kirib kelgani uchun shoshib qolganini aytib, undan uzr so‘radi va qo‘lqopning sertifikatini ko‘rsatdi.

G‘.Salomov sertifikatni qo‘liga olib, u yoq-bu yog‘iga qaradi va ensasi qotgandek, yuzini burishtirib, “bu sertifikat noto‘g‘ri”, deya qaytarib berdi.

Mudir nimasi noto‘g‘riligini so‘raganida taftishchi buni yuqori tashkilotdagilar hal qilishini aytdi va ularga telefon qilib, tekshirishni boshlash haqida ruxsat so‘rashini ma'lum qildi.

Bu gapdan mudirning rangi oqarib, shosha-pisha bu ishni hal qilishning biror yo‘lini topish haqida so‘radi.

G‘.Salomov ozgina “yo‘talsa”, yo‘lini topsa bo‘lishini shivirlab aytar ekan, bitta barmog‘ini ko‘rsatdi-da, ko‘kida ming bersa, ish to‘xtashini shama qildi.

Uning gapini eshitib, endi dorixona mudirining jahli chiqa boshladi. Nima uchun ming dollar berishi kerakligi, tekshirish o‘tkazish uchun asosi bor-yo‘qligini so‘radi.

Bu gaplarni eshitgan G‘.Salomov esa pinagini ham buzmadi. Xotirjam ohangda qizishmaslikni maslahat berdi. So‘ngra, qonunni buzgan javob berishini ta'kidlash barobarida, yonidan qandaydir guvohnomani olib ochdi-yu, shu zahoti yopdi. Xodimlarini yuborishini, ular dorixonaning hujjatlarini elakdan o‘tkazgach esa qing‘ir ishlar fosh bo‘lishi, eng og‘ir moddalar bilan ayb e'lon qilinishini pisanda qildi. Keyin har qancha yalinib kelsa ham, yordam berolmasligini qo‘shib qo‘ydi.

Bu gaplarni eshitgan dorixona mudiri avvaliga biroz cho‘chidi. Garchi hamma ishlari joyida bo‘lsa-da, baribir, ortiqcha ovoragarchilik kimga kerak?! U biroz o‘ylanib turib, rozi bo‘ldi. Ular xayrlashishgach, o‘zining haq ekanligini o‘ylab, shuncha pulni bekordan-bekorga berib yuborish alam qildi. Shu bois vaqtni o‘tkazmay bo‘lib o‘tgan holatni bayon qilib, tegishli idoralarga ariza bilan murojaat qilishga qaror qildi...

Oradan ikki kun o‘tgach, ular kelishilgan joyda uchrashishdi. Dorixona mudiri “taftishchi”ga 500 AQSh dollarini berib, qolganini tezda to‘g‘rilab berishini va'da qildi. Pulni olib, cho‘ntagiga tiqqan “taftishchi”ning quvonchi uzoqqa cho‘zilmadi. Shu zahoti oldilariga kelgan xodimlar o‘zlarini tanishtirib, xolislar ishtirokida uni qo‘lga oldilar. 500 AQSh dollari ashyoviy dalil sifatida rasmiylashtirildi.

G‘aybulla Salomov tergov jarayonida o‘zini organ xodimi, deb tanishtirib, dorixona mudiridan tamagirlik yo‘li bilan pul undirmoqchi bo‘lganligiga to‘liq iqror bo‘ldi.

Jinoyat ishlari bo‘yicha Shayxontohur tuman sudi soxta “taftishchi”ga 3 yil muddatga ozodlikdan mahrum qilish jazosini tayinladi.

Top