Qatar mojarosi neft qazib olish hajmiga qanday ta'sir ko‘rsatadi?

Saudiya Arabistoni energetika vaziri Holid al-Folihning fikricha, Qatar atrofidagi vaziyat OPeK davlatlari tomonidan neft qazib olish hajmini qisqartirish bo‘yicha kelishuvni amalga oshirishga ta'sir ko‘rsatmaydi.

«Men diplomatik masalalar qazib olish hajmini qisqartirishga qandaydir ta'sir ko‘rsatadi, deb hisoblamayman», - deya Folihning so‘zlarini keltiradi TASS.

25 may kuni neft eksport qiluvchi davlatlar tashkiloti ushbu mahsulot qazib olish hajmini qisqartirish haqidagi kelishuvni yana 9 oyga cho‘zdirishni qo‘llab-quvvatladi.

Saudiya Arabistoni, Bahrayn, BAA, Misr, Yaman, Liviya, Maldiv, Mavrikiy, Mavritaniya va Komor esa Qatar bilan diplomatik aloqalarni uzishdi hamda ushbu mamlakatni terrorizmni qo‘llab-quvvatlashda ayblashdi.