RF elchisi O‘zbekiston fuqarolariga Rossiya mukofotlarini topshirdi

Rossiyaning O‘zbekistondagi favqulodda va muxtor elchisi Vladimir Tyurdenev 2017 yilning 12 iyun kuni O‘zbekiston fuqarolariga Rossiya Federatsiyasi mukofotlarini topshirdi.

RFning O‘zbekistondagi diplomatik missiyasi rahbari “Federatsiyalar Kengashi. 20 yil” medalini O‘zbekiston Respublikasi Oliy Majlisi Senati raisining birinchi o‘rinbosari Sodiq Safoyevga topshirdi.

U Rossiya Federatsiyasi Federal Majlisi Federatsiyalar Kengashining buyrug‘iga ko‘ra, Rossiya Federatsiya va O‘zbekiston Respublikasi parlamentlararo aloqalarining rivojiga qo‘shgan katta hissasi uchun mukofotlandi.

Shuningdek, Rossiya elchisi “O‘zbekneftegaz” MXK boshqaruvi raisi Alisher Sultonovga Rossiya Federatsiyasi Federal Majlisi Federatsiyalar Kengashining faxriy yorlig‘ini topshirdi.

Sultonov yorliqni O‘zbekiston Respublikasi va Rossiya Federatsiyasi o‘rtasida do‘stona munosabatlarni mustahkamlashga qo‘shgan hissasi uchun oldi.