Reuters agentligining ikki nafar vaziyatdan xabardor manbasiga tayanib xabar berishicha, Ukraina uchuvchisiz uchish apparatlari Saratov neftni qayta ishlash zavodidagi xom neftni dastlabki qayta ishlashga mo‘ljallangan asosiy CDU-6 qurilmasini ishdan chiqargan.
Manbalarning aytishicha, mazkur qurilma kuniga 20 ming tonnagacha neftni qayta ishlash quvvatiga ega bo‘lgan va zavodda bunday turdagi yagona texnologik liniya hisoblangan. Shu sababli uning ishdan chiqishi butun korxona faoliyatining to‘xtashiga olib kelgan.
Saratov viloyati gubernatori Roman Busargin 8 iyul kuni uchuvchisiz apparatlar hujumi oqibatida «fuqarolik infratuzilmasi obektlari»ga zarar yetganini tasdiqlagan, ammo qaysi obektlar shikastlanganiga aniqlik kiritmagan.
Ukraina Qurolli kuchlari Bosh shtabi esa aynan «Rosneft» kompaniyasiga qarashli Saratov neftni qayta ishlash zavodi nishonga olinganini ma’lum qildi. Ushbu korxona Rossiyaning Ukrainaga qarshi keng ko‘lamli urushi boshlanganidan beri bir necha bor dronlar hujumiga uchragan.
Reutersʼning so‘roviga «Rosneft» kompaniyasi izoh bermagan.
Rossiyada bir nechta yirik NQZ ishini cheklagan
«Novaya gazeta Yevropa» hisob-kitoblariga ko‘ra, 2026 yilning dastlabki olti oyida Ukraina dronlari hujumlari ortidan Rossiyada kamida 13 ta neftni qayta ishlash zavodi to‘liq yoki qisman ishini to‘xtatgan.
Nashr ma’lumotlariga ko‘ra, buning natijasida mamlakat neftni qayta ishlash quvvatlarining taxminan 25 foizi, benzin va dizel yonilg‘isi ishlab chiqarish quvvatlarining esa qariyb 30 foizi vaqtincha ishdan chiqqan.
Ayrim zavodlarda ta’mirlash ishlari bir necha oy davom etishi mumkin. Masalan, iyun oyi o‘rtalarida hujumga uchragan Moskva viloyatidagi Kapotnya neftni qayta ishlash zavodi kamida dekabr oyigacha to‘liq quvvatda ishlay olmasligi aytilgan.
Yonilg‘i taqchilligi millionlab aholiga ta’sir qilmoqda
Financial Times nashri hisob-kitoblariga ko‘ra, iyul oyi boshiga kelib Rossiyada yuzaga kelgan benzin taqchilligi taxminan 50 million nafar aholiga ta’sir ko‘rsatgan. Bu mamlakat aholisining qariyb 35 foiziga teng.
