Ruslarning Su-27 qiruvchi samolyoti Amerikaning razvedkachi-samolyoti bilan yaqinlashdi (foto)

AQSh qurolli kuchlarining Yevropadagi qo‘mondonligi Rossiyaning Su-27 qiruvchi harbiy samolyotining RC-135U razvedkachi samolyotiga yaqinlashgani fotosuratlarini e'lon qildi. Su-27 tomonidan tutib olingan chog‘da Amerika samolyoti Boltiq dengizi uzra xalqaro havo hududida parvoz qilayotgan edi.

«Yaqinlashishning katta tezligi va tutilish vaqtida havo kemasi ustidan nazorat kuchsiz bo‘lgani bois, yaqinlashish xavfli degan to‘xtamga kelingan», — deyiladi xabarda.

Boltiq dengizi uzra Amerika razvedkachi-samolyoti yonidan rus qiruvchi samolyotining uchib o‘tgani haqida dastlab Fox News kanali xabar berdi. Manbalarga ko‘ra, Su-27  RC-135ning yonidan bir yarim metr masofada parvoz qilgan, o‘zini «provakatsion» tutgan va tartibsiz harakat qilgan.

Keyinchalik Rossiya mudofaa vazirligi AQShning razvedkachi-samolyoti Rossiya chegarasi tomon parvoz qilganini va kuzatish chog‘ida esa Rossiyaning Su-27 qiruvchi samolyoti tomon burilib, keskin yaqinlashishga harakat qilganini ta'kidlab o‘tgan. Idoraning bergan ma'lumotiga ko‘ra, o‘sha hududda yana bir RC-135 samolyoti ushlangan.

Foto manbasi: Master Sgt. Charles Larkin Sr/U.S. European Command