O‘zbekiston va Niderlandiya savdo-iqtisodiy hamkorlik masalalarini muhokama qildi

Niderlandiyaning O‘zbekistondagi favqulodda va muxtor elchisi Regina Veronika Mariya Jons-Bos (qarorgohi Moskva shahrida) O‘zbekiston tashqi savdo vazirligida muzokaralar o‘tkazdi. 

Tashqi savdo vazirligi matbuot xizmati bergan xabariga ko‘ra, tomonlar ikki mamlakat o‘rtasidagi savdo-iqtisodiy va investitsiya hamkorligining hozirgi holati va istiqbollarini muhokama qilishgan. 

Uchrashuvda ikki davlat qishloq xo‘jaligi, chorvachilik, meva-sabzavot mahsulotlarini qayta ishlash bo‘yicha ulkan salohiyatga egaligi ta'kidlandi. 

Shuningdek, mamlakatlar ishbilarmon doiralari o‘rtasida bevosita aloqalarni yo‘lga qo‘yish mexanizmi, yillik biznes-forumlarni tashkil etish masalalari muhokama qilingan.