O‘zbekistonda hafta davomida jazirama kuzatiladi

3-9 iyul kunlari O‘zbekiston bo‘ylab jazirama kuzatiladi. Ba'zi hududlarda havo harorati +45 darajagacha ko‘tariladi.

Gidrometeorologiya markazi ma'lum qilishicha, O‘zbekiston hududiga Turkmaniston orqali Erondan issiq va quruq havo oqimi kirib keladi.

Hafta davomida havo harorati ko‘p yillik o‘rtacha ko‘rsatkichlardan 4-6 daraja yuqori bo‘ladi. Kunduz kunlari harorat o‘rtacha +38…+43 darajaga yetadi.

Qoraqalpog‘istonda, Xorazm, Buxoro, Navoiy, Qashqadaryo, Surxondaryo viloyatlarida harorat +44…+45 darajagacha ko‘tariladi, garmsel bo‘lishi kutilmoqda.

Havo harorati ko‘tarilishi munosabati bilan 3-9 iyul kunlari respublikaning tog‘oldi va tog‘ hududlarida Tojikiston hamda Qirg‘izistondagi muzlar erishidan hosil bo‘lgan sel oqimlari kelishi xavfi bor.