Toshkent viloyati ma'muriy markazi xorijlik arxitektorlar tomonidan quriladi

Shavkat Mirziyoyev Toshkent viloyatida olib boriladigan qurilish ishlari bilan tanishdi. Uning ma'lum qilishicha, Toshkent viloyati ma'muriy markazi - To‘ytepa shahri xorijlik arxitektorlar tomonidan quriladi.

«Shu kungacha Toshkent viloyatining ma'muriy markazi yo‘q edi. Bugun bu ishga kirishmasak ertaga kech bo‘ladi», — degan Prezident. 

Davlat rahbari To‘ytepa shahrini viloyatning markazi sifatida qayta qurish tadbirlari amalga oshirilayotgani, bu borada xorijdan arxitektorlar taklif qilinganini ta'kidladi.

Prezident loyiha bilan tanishar ekan, Toshkent—To‘ytepa yo‘li atrofida zamonaviy uy-joylar qurish, ijtimoiy soha obektlarini zamon talablari darajasida barpo etish bo‘yicha ko‘rsatmalar berdi.

Eslatib o‘tamiz, yil avvalida Toshkent viloyati ma'muriyati To‘ytepa shahriga ko‘chib o‘tgandi.