Sayyoh samolyotlardan foydalanmay 50 ta davlatga bordi

Avstraliyalik bloger Tiral Dalits Sidneydan AQShning San-Diyego shahriga aviakompaniyalar xizmatidan foydalanmagan holda yetib bordi. 29 yoshli erkak uch yil vaqtini sarflagan sayohat davomida taxminan 80 ming kilometr masofani bosib o‘tdi hamda 50 ta davlatga bordi. Bu haqda Daily Mail xabar bermoqda.

Dalits sayohat davomida kundalik ham tutib bordi. U Avstraliyadan Indoneziya, Singapur, Malayziya va Tailandga yo‘l oldi. Keyinchalik Laos, Kamboja, Vetnam hamda Xitoyga tashrif buyurdi. Xitoydan u Mo‘g‘uliston orqali Rossiyaga bordi, keyin esa o‘z sayohatini Yevropa davlatlari bo‘ylab davom ettirdi.

Erkak safari davomida kemalar, velosiped, avtotransport va poyezdlarda harakatlandi. Sayohatchi safarga taxminan 22 ming dollar sarfladi.

Endilikda Dalits Amerikaning San-Diyego shahridan Sidneyga qaytib kelishni rejalashtirmoqda.