Tramp Qatar sovg‘a qilgan 400 mln dollarlik yangi samolyotni namoyish qildi

AQSh prezidenti Donald Tramp Qatar hukumati tomonidan sovg‘a qilingan va yangi Air Force One sifatida xizmat qiladigan 400 mln dollarlik hashamatli Boeing 747-8 samolyotini namoyish qildi.

Taqdimot Vashington yaqinidagi Endryus harbiy bazasida bo‘lib o‘tdi.

«Bunaqasi hech qachon bo‘lmagan. Bu juda noyob. U dunyodagi eng hashamatli samolyot hisoblanadi», dedi AQSh prezidenti.

Trampning bildirishicha, yangi samolyot 4 iyul kuni — mamlakat tashkil topganining 250 yilligi munosabati bilan Vashington osmonida o‘tkaziladigan havo paradiga boshchilik qiladi. 

Havo kuchlari tarqatgan bayonotga ko‘ra, samolyot yaqin kunlarda «sinov parvozlari»ni boshlaydi.

Bayonotda ta’kidlanishicha, samolyot «himoyalangan va prezidentlik missiyasi talablarini bajarish uchun zarur bo‘lgan eng ilg‘or texnologiyalar bilan jihozlangan».

Ma’lum qilinishicha, uchuvchilar va texnik xizmat ko‘rsatuvchi xodimlar yangi modelda tayyorgarlik ko‘rishi uchun avval Lufthansa aviakompaniyasi foydalangan Boeing 747-8 samolyoti sotib olingan.

Sovg‘a qilingan samolyot 30 yildan ortiq vaqt davomida prezidentlarga xizmat qilgan Boeing 747-2 o‘rnini egallaydi. Tramp payshanba kuni Yevropadan aynan eski samolyotda qaytib keldi va Oq uy xodimlari ijtimoiy tarmoqlarda “yoshi o‘tib qolgan” samolyot bilan xayrlashuv xabarlarini joylashtirishdi.

Tramp xorijiy hukumatdan sovg‘aga samolyot qabul qilish manfaatlar to‘qnashuvi yoki xavfsizlikka tahdid tug‘dirishi haqidagi tanqidlarni rad etgan, «Nega bizning harbiylarimiz va shuningdek soliq to‘lovchilarimiz yuzlab million dollar to‘lashi kerak, agar buni yaxshi bajarilgan ish uchun bizni taqdirlashni istagan mamlakatdan bepul olish mumkin bo‘lsa? Mamlakatimiz nomidan bu sovg‘ani qabul qilmaydigan odam faqat ahmoq bo‘lishi mumkin» deb yozgandi u o‘tgan yili Truth Social tarmog‘ida.

Trampning bildirishicha, Qatar samolyoti 2028 yilda Boeing kompaniyasining yangi samolyotlari Havo kuchlariga yetkazib berilguniga qadar ishlatiladi.

Yangi Boeing 747-8 samolyotining qiymati 400 mln dollar deb baholangan. Samolyotni prezident floti uchun qayta jihozlash ham yuzlab million dollarga tushishi taxmin qilingan.